2026 jyly 23–26 shilde aralyǵynda Almatyda bilim berý, kreatıvti ındýstrıa, jasandy ıntellekt jáne sıfrlyq tehnologıa salasynyń Qazaqstan men Koreıa Respýblıkasyndaǵy ókilderin biriktiretin ACT Creative Tech Week 2026 halyqaralyq forýmy ótedi, - dep habarlaıdy alnews.
Forýmdy ótkizý Seýl qalasynda «Dıalog» aýdarmashylar odaǵy» qoǵamdyq birlestigi, Academy of Creative Technologies (ACT) jáne YLAB Academy arasynda qol qoıylǵan ózara túsinistik týraly memorandýmdy iske asyrýdyń alǵashqy praktıkalyq qadamy boldy.
2026 jyly 4 shildede Seýl qalasynda «Dıalog» aýdarmashylar odaǵy» qoǵamdyq birlestigi, Academy of Creative Technologies (ACT) jáne YLAB Academy ózara túsinistik týraly memorandýmǵa qol qoıdy.
Qujat bilim berý, kreatıvti ındýstrıa, jasandy ıntellekt jáne sıfrlyq tehnologıa salalaryndaǵy yntymaqtastyqty damytýdy kózdeıdi. Taraptar birlesken bilim berý baǵdarlamalaryn ázirlep, halyqaralyq is-sharalar ótkizedi jáne kásibı tájirıbe almasady.
ACT – ALT University bazasynda jumys isteıtin, jasandy ıntellekt, aqparattyq tehnologıa jáne kreatıvti tehnologıa salalary boıynsha mamandar daıarlaıtyn halyqaralyq bilim berý platformasy. Al YLAB Academy – vebtýn ındýstrıasy men zıatkerlik menshik (IP) ázirleý baǵytyndaǵy álemdik kóshbasshylardyń biri sanalatyn YLAB kompanıasynyń bilim berý bólimshesi.
