2026 jyly 15 qyrkúıek pen 25 qazan aralyǵynda Almatyda kemirgishterge qarsy kúzgi jappaı dárileý júrgiziledi, - dep habarlaıdy alnews.
Kemirgishter mekendeıtin ashyq aýmaqtarda jalpy kólemi 47 myń gektardan asatyn qoǵamdyq paıdalanýdaǵy jerler dárilenedi. Bul týraly qalalyq Komýnaldyq ınfraqurylym jáne turǵyn úı ınspeksıasy basqarmasynyń ókilderi habarlady.
Kúzgi kezeń aıasynda mamandar jasyl aımaqtardy, ashyq bıotoptardy, kemirgishterdiń inderin, aryq jelilerin, ózender men sý aıdyndarynyń jaǵalaýlaryn, sondaı-aq qoǵamdyq kólik aıaldamalarynyń aýmaqtaryn dárileıdi. Jeke sektor turǵyndaryna arnaıy jem tegin taratylady. Jemmen birge ony qaýipsiz ári durys qoldaný tártibi túsindirilip, tıisti nusqaýlyq beriledi.
Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» kodeksiniń 107-babyna sáıkes, jeke jáne zańdy tulǵalar dezınfeksıa, dezınseksıa jáne deratızasıa jumystaryn óz qarajaty esebinen júrgizýge mindetti.
Sol sebepti jeke aýmaqtar, jer ýchaskeleri, ǵımarattar men qurylystardy dárileý jumystaryn olardyń ıesi júrgizedi. Kóppáterli turǵyn úılerdiń jertóleleri, shatyrlary, baspaldaq alańdary men aýla aýmaqtarymen qatar, ortaq múliktegi deratızasıa jumystary PIK nemese MIB qarajaty esebinen júzege asyrylady. Sondaı-aq, bul jumystarǵa úı-jaılardyń ıeleri men jalǵa alýshylary jaýapty.
Dárileý jumystarynyń tıimdiligin arttyrý maqsatynda zańdy tulǵalarǵa, PIK, MIB jáne basqa da jaýapty uıymdarǵa qaramaǵyndaǵy ǵımarattar, aýmaqtar men qoqys konteınerleri ornalasqan alańdarda deratızasıa jumystaryn qalalyq is-sharalarmen birge júrgizý usynylady.
