«Almaty» ÁKK» AQ-nyń enshiles uıymy «Almaty Finance» JSHS jańa stýdentter jataqhanasynyń qurylysyn salý úshin «BAZA 271» JSHS-ne jeńildetilgen qarjylandyrý usyndy, - dep habarlaıdy alnews.
Jobany júzege asyrýǵa «Almaty Business – 2025» baǵdarlamasy aıasynda jyldyq 6% mólsherlememen, 7 jyl merzimge 500 mln teńge bólindi.
Joba Almatynyń bilim berý ınfraqurylymyn damytýǵa, stýdentterdi zamanaýı ári jaıly turǵyn úımen qamtamasyz etýge jáne stýdenttik jataqhanalardaǵy oryn tapshylyǵyn azaıtýǵa baǵyttalǵan.
Jalpy aýdany 3 537,2 sharshy metr bolatyn jańa jataqhana 400 orynǵa eseptelgen. Ǵımarat tórt qabattan jáne jertóle qabatynan turady. Munda Almatydaǵy joǵary oqý oryndarynyń stýdentteri tura alady.
Jobanyń jalpy quny 750 mln teńge. Onyń ishinde 250 mln teńge – ınvestordyń óz qarajaty, al 500 mln teńge – «Almaty Finance» JSHS usynǵan qaryz qarajaty. Sonymen qatar joba Qazaqstan Respýblıkasy Ǵylym jáne joǵary bilim mınıstrliginiń «Qarjy ortalyǵy» AQ arqyly memlekettik sýbsıdıalaý tetigimen júzege asyrylady. Sýbsıdıa mólsheri – jataqhanada turatyn árbir stýdentke 230 AEK.
Jataqhanada turýdyń josparlanǵan quny – bir stýdentke aıyna 45 myń teńge.
«Jańa jataqhananyń qurylysy stýdentterdi zamanaýı ári jaıly turmys jaǵdaıymen qamtamasyz etýge jáne qalanyń qoldanystaǵy ınfraqurylymyna túsetin júktemeni azaıtýǵa múmkindik beredi. Qurylysty 2026 jyly qarasha aıynda aıaqtaý josparlanyp otyr. Sonymen qatar joba aıasynda 11 jańa jumys orny ashylady», – dedi «Almaty Finance» JSHS basqarma tóraǵasynyń orynbasary Emıl Ospanov.
