Almatyda halyqty jumyspen qamtýǵa baǵyttalǵan sharalar jalǵasyp keledi, - dep habarlaıdy alnews.
Bıylǵy jyldyń ekinshi toqsanynyń qorytyndysy boıynsha qaladaǵy jumys kúshi 1 mln 217,5 myń adamǵa jetti. Bul ótken jyldyń osy kezeńimen salystyrǵanda 43 myń adamǵa kóp. Bul týraly Almaty qalasynyń Jumyspen qamtý jáne áleýmettik baǵdarlamalar basqarmasynyń ókilderi aıtty.
Jumyspen qamtylǵan halyq sany 1 mln 164 myń adamǵa jetti. Bul bir jyl burynǵy kórsetkishten 41,7 myń adamǵa kóp. Almatydaǵy jumyssyzdyq deńgeıi 4,4% bolyp, respýblıkalyq kórsetkishten tómen deńgeıde saqtaldy.
Jyl basynan beri Eńbek mobıldiligi ortalyǵyna 54 044 adam júgingen. Onyń 43 942-si jumyssyz retinde tirkeldi. Jalpy 42 766 adam jumyspen qamtýǵa járdemdesý sharalaryna qatysty.
Onyń ishinde 8 755 almatylyq turaqty jumysqa ornalasty. Sonymen qatar 5 613 adam sýbsıdıalanatyn jumys oryndaryna joldama aldy. Atap aıtqanda, 4 150 adam qoǵamdyq jumystarǵa, 614 adam «Kúmis jas» jobasyna, 362 adam «Altyn jas» jobasyna qatysty. Taǵy 305 adam áleýmettik jumys oryndaryna ornalassa, 182 adam jastar praktıkasyna jiberildi.
Kásiptik oqytý men biliktilikti arttyrýǵa erekshe nazar aýdarylyp otyr. Bıyl 538 adam kásiptik oqýdan ótti, onyń 451-i jumys ornynda bilim aldy. «Bastaý Bıznes» jobasy aıasynda 1 538 adam oqýdan ótse, taǵy 2 215 adam enbek.kz platformasy arqyly jańa daǵdylardy meńgerdi. Kásiptik baǵdar berý sharalarymen 23 922 adam qamtyldy.
Kásip bastaýǵa nıetti azamattarǵa da qoldaý kórsetiledi. Bıyl 400 AEK, ıaǵnı 1,73 mln teńgege deıingi qaıtarymsyz grant 165 adamǵa berildi. Granttardyń jalpy somasy 285,1 mln teńge.
2026 jyly Almatyda 51 270 jumys ornyn qurý josparlanǵan, onyń 45 399-y turaqty jumys orny. 1 qyrkúıektegi jaǵdaı boıynsha qalada 53 026 jumys orny quryldy. Bul jyldyq jospardyń 103,4%-y bolady. Onyń ishinde 47 441-i – turaqty jumys orny, bul josparlanǵan kórsetkishtiń 104,5%-yna teń. Sonyń ishinde 8 775 adam bos jumys oryndaryna ornalastyryldy.
