Almatynyń Naýryzbaı aýdanyndaǵy Asqarov kóshesi, 33/2 mekenjaıynda ornalasqan sý qubyry nysanyn qaıta jańǵyrtý jumystary aıaqtaldy, - dep habarlaıdy alnews.
Nysan Naýryzbaı jáne Bostandyq aýdandarynyń shamamen 15 myń turǵynyn sýmen qamtamasyz etedi. Bul týraly Almaty qalasy Energetıka jáne sýmen jabdyqtaý basqarmasynyń ókilderi aıtty.
Jumys barysynda ekinshi kóterilimdegi jańa sorǵy stansıasy salynyp, oǵan bes sorǵy ornatyldy. Onyń úsheýi turaqty jumys istese, ekeýi rezervte bolady. Sonymen qatar jalpy syıymdylyǵy 2 myń tekshe metr bolatyn eki taza sý rezervýary jańǵyrtylyp, ınjenerlik jeliler jańartyldy. Sondaı-aq, zamanaýı avtomatty baqylaý júıesi ornatyldy.
Budan bólek, transformator qosalqy stansıasy ornalasqan qyzmettik ǵımarat qaıta jańǵyrtylyp, jańa baqylaý-ótkizý pýnkti salyndy. Elektrmen jabdyqtaý, syrtqy jaryqtandyrý jáne qaýipsizdik júıeleri de jańartyldy.
Nysan paıdalanýǵa berildi. Basqarmanyń málimetinshe, júrgizilgen jańǵyrtý jumystary sý qubyry jelisindegi qysymdy turaqty ustap turýǵa, ásirese sý tutyný kólemi artatyn ýaqytta, sondaı-aq sý berýdegi irkilisterdiń aldyn alýǵa múmkindik beredi.
