Almatyda 10 myń kópqabatty turǵyn úı joǵary jyldamdyqty ınternetke qosylady

Almatyda telekomýnıkasıalyq ınfraqurylymdy jańǵyrtý jáne XGSPON joǵary jyldamdyqty ınternet tehnologıasyn engizý jalǵasyp jatyr. Bul týraly qalalyq Sıfrlandyrý basqarmasynyń ókilderi habarlady.
 
Atalǵan tehnologıa derekterdi 10 Gbıt/s-qa deıingi jyldamdyqpen taratýǵa múmkindik beredi. Almaty XGSPON tehnologıasyn Wi-Fi 6 júıesimen birge engizgen Qazaqstandaǵy alǵashqy qala atandy.
 
Qazirgi ýaqytta jańa ınfraqurylymǵa Túrksib aýdanyndaǵy 80 turǵyn úı, sondaı-aq Naýryzbaı jáne Áýezov aýdandaryndaǵy 700-den astam turǵyn úı qosylǵan.
 
2026 jyly joǵary jyldamdyqty ınternetke 10 myń kópqabatty turǵyn úıdi qosý, kireberisterge 40 myń beınekamera ornatý jáne 10 myń páterge áleýmettik tarıf usyný josparlanyp otyr.
 
Shaharda 1 myńnan astam qoǵamdyq Wi-Fi núktesi jumys isteıdi. Qala boıynsha 900-den astam 5G bazalyq stansıa ornatylǵan. 11 metro beketiniń barlyǵy jańa býyn mobıldi baılanyspen qamtylǵan.