Almatynyń Medeý aýdanyndaǵy №56 Q. Sátbaev atyndaǵy gımnazıa men №17 mektep-ınternat kúrdeli jóndeýden keıin qaıta ashyldy, - dep habarlaıdy alnews.
Jańa zerthanalar, jańartylǵan oqý kabınetteri men sport alańdary oqýshylardyń ıgiligine berildi. Búgin gımnazıanyń 1 400 oqýshysy men mektep-ınternattyń 166 tárbıelenýshisi jańartylǵan ǵımarattarda oqýyn jalǵastyrdy.
№56 gımnazıada ǵylym men tehnologıany meńgerýge múmkindik jasaldy. Munda robototehnıka kabıneti men zamanaýı zerthanasy bar STEM kabıneti ashyldy. Fızıka jáne hımıa zerthanasy jańartylyp, oqý kabınetteri jańa jıhazben jáne kompúterlik tehnıkamen jabdyqtaldy.
Sabaqtan tys ýaqytta paıdalanylatyn oryndar da jańardy. Májilis zaly keńirek bólmege kóshirilip, jańa jabdyqtarmen qamtamasyz etildi. Kitaphana jańǵyrtyldy. Sport zaly keńeıtilip, dýsh bólmesi bar kıim aýystyratyn oryndar jabdyqtaldy. Gımnazıa aýmaǵyndaǵy fýtbol jáne basketbol alańdary, júgirý joly da jańartyldy.
№17 mektep-ınternatta oqý jáne jatyn bólmeleriniń bári jóndeýden ótti. Balalar munda aptasyna bes kún bolǵandyqtan, oqý kabınetterin jabdyqtaýmen qatar, olardyń turmys jaǵdaıyna da erekshe kóńil bólindi. Jatyn bólmelerge jańa kereýetter men jıhazdar qoıyldy. 120 oryndyq asqana jańa tehnıkamen jabdyqtaldy. Tárbıelenýshiler kúnine bes ret ystyq tamaqpen qamtamasyz etiledi.
Tarıh, bıologıa jáne aǵylshyn tili kabınetteri zamanaýı qural-jabdyqtarmen tolyqty. Mektep-ınternatqa ınteraktıvti taqtalar ornatylyp, sport zaly men sport alańy jańartyldy.
Ǵımarattardyń qaýipsizdigine de aıryqsha nazar aýdaryldy. №17 mektep-ınternatta seısmıkalyq kúsheıtý jumystary júrgizildi. Al №56 gımnazıada ınjenerlik jeliler, beınebaqylaý jáne órt dabyly júıeleri jańartyldy.
Jańartylǵan ǵımarattarǵa oralǵan oqýshylar ekinshi toqsandy jaıly ári qaýipsiz ortada bastady. Endi olardyń sapaly bilim alyp, shyǵarmashylyqpen aınalysýyna jáne sportpen shuǵyldanýyna barlyq jaǵdaı jasalǵan.
