Uly Jeńistiń 80 jyldyǵyna oraı Almaty qalasynda «Ardagerge qurmet» atty aýqymdy qaıyrymdylyq aksıasy ótti, - dep habarlaıdy alnews.
Aksıa aıasynda Almaty qalasynyń eriktileri soǵys ardagerlerine turmystyq jáne áleýmettik qoldaý kórsetip, ardagerlerge degen sheksiz qurmet pen rızashylyǵyn bildirdi.
Eriktiler ardagerlerdiń úılerine baryp, azyq-túlik pen qajetti zattardy jetkizdi, sondaı-aq turmystyq sharýalarǵa kómek kórsetti. Bul aksıa tek aǵa býynǵa degen qamqorlyqtyń kórinisi ǵana emes, sonymen qatar jastar men ardagerler arasyndaǵy urpaqtar sabaqtastyǵyn nyǵaıtý jolyndaǵy mańyzdy qadam boldy. Aksıa aıasynda Almaty qalasynda turatyn barlyq 21 UOS ardagerin qamtý josparlanyp otyr.
«Biz ardagerlerge jaı ǵana kómek kórsetip jatqan joqpyz. Bul – erlikke taǵzym, tarıhqa qurmet. Olardyń árbir esteligi – biz úshin tiri shejire. Osyndaı kezdesýler arqyly biz shynaıy patrıotızm men jaýapkershilik sezimin úırenemiz», – dep erikti Shámshi Qudaıbergen atap ótti.
Eriktiler atap ótkendeı, bul bir rettik shara emes. Ol – almatylyq jastardyń júıeli túrde júzege asyryp kele jatqan turaqty bastamasynyń quramdas bóligi. Almaty qalasynyń eriktileri mundaı qaıyrymdylyq is-sharalaryn únemi uıymdastyryp otyrady. Máselen, qys mezgilinde olar ardagerler men zeınetkerlerdiń aýlalaryn qardan tazartýǵa kómektesip, komýnaldyq qyzmet ókilderine ystyq shaı taratý boıynsha aksıalar ótkizedi. Bul bastamalar – jastardyń belsendi azamattyq ustanymynyń, qoǵamdaǵy birliktiń jáne adamdarǵa degen shynaıy janashyrlyqtyń aıqyn kórinisi.
