Almaty volonterleri 100-den astam balalar úıiniń tárbıelenýshilerine arnap kıno kórsetilim uıymdastyrdy
Almaty qalasynda ata-ana qamqorlyǵynsyz qalǵan balalar úshin erekshe ári áserli shara ótti. Almaty qalasy Jastar saıasaty basqarmasynyń qoldaýymen júzege asyrylyp jatqan «Áleýmettik sheberhana» jobasy aıasynda 100-den astam tárbıelenýshige arnap kınoǵa barý uıymdastyryldy. Balalar otandyq týyndyny kórip, shynaıy emosıalar men qýanyshty sátterge bólendi.
Jobanyń maqsaty – balalarǵa tek syılyq emes, eń bastysy – qamqorlyq pen kóńil bólý arqyly jylýlyq syılaý, olardy qoǵamnyń bir bólshegi ekenin sezindirý. Volonterler mundaı sharalardyń mańyzdylyǵy materıaldyq kómekten kem emes ekenin atap ótedi.
Jobanyń eriktisi Shamshı Qudaıbergen óz oıymen bólisti:
«Biz úshin mundaı sharalar materıaldyq kómekten kem emes. Bul – emosıa, bul – shynaıy kóńil bólý. Balalardyń kúlip, máz bolyp, fılmnen keıin áserimen bóliskenin kórý – bizdiń basty maqsatymyzdyń oryndalǵanyn bildiredi. Ár bala — mańyzdy, jáne biz sony kórsetkimiz keledi».
«Áleýmettik sheberhana» jobasy aldaǵy ýaqytta da balalar úshin túrli ıgi sharalardy jalǵastyra bermek. Alda – tanymdyq ekskýrsıalar, sheberlik sabaqtary, akterlermen kezdesýler jáne taǵy da basqa is-sharalar josparlanǵan.
