Almatyda «Eco Almaty» JSHS-niń aqparattyq qoldaýymen júzege asyrylyp jatqan «Eko-Trak» jobasy jumysyn jalǵastyryp keledi, - dep habarlaıdy alnews.
Joba qala turǵyndary arasynda ekologıalyq mádenıetti qalyptastyrýǵa jáne qaldyqty bólek jınaý tájirıbesin keńinen nasıhattaýǵa baǵyttalǵan.
Kezekti aýla ekoaksıasy Mountain Drive turǵyn úı kesheninde ótti. Bul keshenniń turǵyndary ECO Network jáne «Eko-Hab» jobalarynyń negizin qalaýshy Evgenıı Mýhamedjanov uıymdastyrǵan ekologıalyq bastama aıasynda jeńimpaz atanǵan bolatyn.
Bıyl 16 mamyrda «Gúlder» turǵyn úı kesheninde ótken alǵashqy kóshpeli is-sharadan keıin almatylyqtarǵa aýlasynyń mekenjaıyn kórsetip, ótinim qaldyrý usynylǵan edi. Eń kóp ótinim dál Mountain Drive turǵyndarynan túskendikten, «Eko-Trak» osy turǵyn úı keshenine bardy.
Aksıa barysynda turǵyndarǵa mobıldi ekologıalyq alań qyzmet kórsetti. Qatysýshylar bólek jınalǵan qaldyqtaryn qaıta óńdeýge tapsyryp, ekologıalyq taqyryptaǵy ınteraktıvti is-sharalarǵa qatysty. Sondaı-aq, olar plasık qaqpaqtardy usaqtaýǵa arnalǵan veloshrederlerdi paıdalaný múmkindigine ıe boldy.
Ekoaksıaǵa shamamen 150 turǵyn qatysty. Sonyń nátıjesinde qaıta óńdeýge 1200-den astam plasık qaqpaq jınaldy. Sonymen qatar qatysýshylar 10 kg makýlatýra, 5 kg plasık, 3 kg polıetılen jáne 1 kg shyny bótelke tapsyrdy.
«Eko-Trak» – Almatydaǵy qaldyqtardy bólek qabyldaýdy aǵartýshylyq jáne ınteraktıvti baǵdarlamamen ushtastyratyn alǵashqy kóshpeli ekologıalyq zerthana. Mundaı format turǵyndardy qaldyqtarmen jaýapkershilikpen jumys isteý qaǵıdalarymen tanystyryp, ártúrli jastaǵy azamattardy ekologıalyq bastamalarǵa tartýǵa múmkindik beredi.
Osyndaı jobalardy júzege asyrý qaldyqtardy bólek jınaý mádenıetin damytýǵa, qala turǵyndarynyń ekologıalyq jaýapkershiligin arttyrýǵa jáne Almatyda qaldyqtardy turaqty basqarý júıesiniń damýyna yqpal etedi.
