Almaty shaǵyn jáne orta bıznesti damytý boıynsha kóshbasshy mártebesin saqtap keledi

Almaty shaǵyn jáne orta kásipkerlikti damytý kórsetkishteri boıynsha da elimizdegi jetekshi óńirlerdiń biri bolyp qala beredi. Búginde megapolıs shaǵyn jáne orta kásipkerlik ónimin óndirý kólemi boıynsha elimizde kósh bastap keledi. Sonymen qatar saýda salasyn damytý jáne bıznesti qoldaý sharalaryn iske asyrý baǵytynda da birinshi orynda tur, - dep habarlaıdy alnews.
 
Almaty qalasy Kásipkerlik jáne ınvestısıalar basqarmasy ókilderiniń málimetinshe, 2026 jyly 1 shildedegi jaǵdaı boıynsha qalada 362 345 belsendi shaǵyn jáne orta kásipkerlik sýbektisi jumys isteıdi. 2025 jyldyń qorytyndysynda shaǵyn jáne orta kásipkerlik sýbektileri óndirgen ónim kólemi 306,2 mlrd teńge bolyp, aldyńǵy jylmen salystyrǵanda 3,1%-ǵa ósti.
 
Kásipkerlik belsendilikti odan ári damytý maqsatynda Almatyda bıznesti qoldaýdyń memlekettik jáne óńirlik baǵdarlamalary iske asyrylyp jatyr. 2026 jyly jergilikti búdjetten kásipkerlerdi sýbsıdıalaý men jeńildetilgen nesıeleýge 26 mlrd teńge bólindi. Bıylǵy jyldyń birinshi toqsanynda 304 jobaǵa qoldaý kórsetilip, jalpy somasy 46 mlrd teńgeniń nesıesi berildi.
 
Qala ekonomıkasynyń damýyna saýda salasy da qomaqty úles qosyp keledi. Almaty respýblıka boıynsha saýda salasynda da kósh bastap tur. Qala respýblıkadaǵy jalpy saýda kóleminiń 34%-yn qamtamasyz etedi. 2026 jyldyń alǵashqy alty aıynda saýda aınalymy 12,3 trln teńgege jetip, ótken jyldyń osy kezeńimen salystyrǵanda 5,3%-ǵa artty.
 
Kásipkerlikti qoldaýdyń negizgi baǵyttarynyń biri – shaǵyn ónerkásiptik parkterdi damytý. Bul tetik kásipkerlerge zamanaýı óndiristik ınfraqurylymǵa qol jetkizýge múmkindik berip, jańa jumys oryndaryn ashýǵa yqpal etedi.
 
Qazirgi ýaqytta Almatyda jalpy quny 53,1 mlrd teńge bolatyn 70 shaǵyn ónerkásiptik park jobasyn júzege asyrý josparlanǵan. Sonyń nátıjesinde 6 874 jańa jumys orny qurylyp, óndiristik maqsattaǵy 430 myń sharshy metrden astam alań paıdalanýǵa beriledi.
 
Jańa formattaǵy ónerkásiptik parkterde óndiristik sehtarmen qatar keńse, kórme jáne servıstik aımaqtar ornalasady. Bul mashına jasaý, tamaq, jıhaz, hımıa jáne qurylys ındýstrıasy kásiporyndarynyń damýyna serpin beredi.
 
Mamandardyń aıtýynsha, kásipkerlikti qoldaý men óndiristik ınfraqurylymdy damytýǵa baǵyttalǵan bul jobalar Almatynyń ınvestısıalyq tartymdylyǵyn kúsheıtip, ekonomıkanyń turaqty ósýine jol ashady.