Almatyda Qazaqstan Respýblıkasy Konstıtýsıasynyń jańa redaksıasynyń jobasyn talqylaýǵa arnalǵan Almaty qalasy máslıhaty men Qoǵamdyq keńestiń birlesken otyrysy ótti. İs-sharaǵa máslıhat depýtattary men Qoǵamdyq keńes músheleri qatysty, - dep habarlaıdy alnews.
Otyrysta jańa Konstıtýsıa jobasynyń negizgi erejeleri, onyń tujyrymdamalyq negizderi, sondaı-aq kútiletin ınstıtýsıonaldyq jáne áleýmettik ózgerister jan-jaqty qaraldy. Usynylyp otyrǵan reformalardyń adamǵa baǵdarlanǵan sıpatyna, bılik tarmaqtary arasyndaǵy ókilettikterdi qaıta bólýge, zań ústemdigi qaǵıdatyn kúsheıtýge jáne azamattardyń memlekettik basqarýǵa qatysýyn keńeıtýge erekshe nazar aýdaryldy.
Otyrysta sóz sóılegen Almaty qalasy máslıhatynyń tóraǵasy, Konstıtýsıalyq reforma jónindegi komısıanyń múshesi Meıirjan Otynshıev Konstıtýsıanyń jańa redaksıasy keń aýqymdy qoǵamdyq dıalogtyń nátıjesi ekenin jáne memlekettik basqarý júıesin jańǵyrtýǵa degen qoǵamnyń kemel suranysyn kórsetetinin atap ótti.
«Jańa Konstıtýsıa jobasy – memlekettiń damýynyń jańa kezeńin aıqyndaıtyn qujat. Munda barlyq sheshimderdiń ózeginde adam, onyń quqyqtary men qadir-qasıeti tur. Eń mańyzdy ózgeristerdiń biri – halyqtyń egemendiktiń birden-bir ıesi retinde konstıtýsıalyq deńgeıde bekitilýi. Bul bıliktiń barlyq ınstıtýttarynyń qoǵam aldyndaǵy jaýapkershiligin túbegeıli kúsheıtedi», – dedi Meıirjan Otynshıev.
A. Baıtursynuly atyndaǵy Til bilimi ınstıtýtynyń dırektory, Almaty qalasynyń Qoǵamdyq keńesiniń múshesi, Konstıtýsıalyq reforma jónindegi komısıanyń múshesi Anar Fazyljanova fılolog retinde ózi úshin jańa Konstıtýsıa jobasynyń bastapqyda qazaq tilinde ázirlenýi asa mańyzdy ekenin atap ótti. Onyń aıtýynsha, dál qazaq tilindegi nusqa qujattyń quqyqtyq negizi bolyp sanalady, al jobany daıyndaýdyń ashyq sıpaty men keń qoǵamdyq qatysý reformanyń mazmunyn tereńdetip, onyń qundylyǵyn arttyrady.
Sondaı-aq Almaty qalasy Qoǵamdyq keńesiniń tóraǵasy Mahambet Hasenov keńeıtilgen baıandama jasap, konstıtýsıalyq ózgeristerdiń tarıhı mańyzyn jáne azamattyq qoǵam ınstıtýttarynyń róliniń artyp kele jatqanyn atap ótti.
«Búgin sapaly túsindirý jumysy erekshe mańyzdy. Konstıtýsıa árbir azamatqa túsinikti bolyp, kúndelikti ómirde naqty qoldanylýy tıis. Qoǵamdyq keńes aldaǵy ýaqytta da konstıtýsıalyq reformalardy iske asyrýda jáne Ádiletti Qazaqstandy qurý jolynda belsendi ári ustanymdy ról atqaratynyna senimdimin», – dedi Mahambet Hasenov.
Otyrys qorytyndysynda qatysýshylar halyqpen ashyq ári mazmundy dıalogty jalǵastyrýdyń mańyzyn atap ótti. Ásirese qoǵamdyq pikirlerdiń alýandyǵy men belsendi azamattar shoǵyrlanǵan iri megapolıs – Almaty qalasy úshin mundaı talqylaýlardyń ózektiligi erekshe ekeni aıtyldy.
