Almaty qalasynda balalar úıiniń tárbıelenýshileri arasynda «Januıa» mamandandyrylǵan kesheniniń negizinde sporttyq spartakıada uıymdastyryldy. Almaty qalasynyń Jastar saıasaty basqarmasynyń qoldaýymen, Shara Almaty qalasy volonterleriniń uıymdastyrýymen, «Áleýmettik sheberhana» jobasy aıasynda ótkizildi.
Spartakıadaǵa 100-den astam bala men jasóspirim qatysty. Saıystar fýtbol,basketbol, shahmat, ústel tenısi, toǵyzqumalaq sport túrleri boıynsha ótti. İs-sharanyń basty maqsaty – balalardyń sporttyq qabiletterin damytý, komandalyq rýhty nyǵaıtý, sondaı-aq olardyń belsendi ári senimdi ortada ózin erkin sezinýine múmkindik berý.
«Áleýmettik sheberhana» jobasy aıasynda jobasy aıasynda tárbıeshiler úshin túrli sheberlik sabaqtar, oıyn formatyndaǵy sabaqtar, jeke damý trenıńteri men mádenı-áleýmettik kezdesýler uıymdastyrylýda.Olardyń negizgi maqsaty – jasóspirimderdiń shyǵarmashylyq, sporttyq jáne qoǵamdyq belsendiligin arttyrý, jeke qabiletterin damytý jáne qoǵammen etene baılanysyn kúsheıtý.
Uıymdastyrýshylardyń aıtýynsha, mundaı jobalar balalar úıiniń tárbıelenýshilerin áleýmettendirý, ózin-ózi baǵalaý deńgeıin kóterý jáne olardyń qoǵammen baılanysyn keńeıtýge baǵyttalǵan:
«Biz úshin jaı ǵana is-shara ótkizý emes, balalar ózderin qamqorlyq pen nazarda ekenin sezinetin orta qalyptastyrý mańyzdy. Sport – tártipke, syılastyqqa jáne maqsatqa jetýge úıretedi. Almaty volonterleri retinde, biz balalar úıleri men áleýmettik mekemeler tárbıelenýshileri úshin turaqty túrde shyǵarmashylyq, bilim berý jáne damý baǵytyndaǵy is-sharalardy ótkizip turýǵa tyrysamyz. Sebebi, ár bala mańyzdy, ár balaǵa senim qajet», – deıdi jobanyń úılestirýshisi Qudaıbergen Shámshi.
Aıta keteıik, «Áleýmettik sheberhana» jobasy birneshe jyldan beri volonterlerdi, pedagogtardy, psıhologtardy jáne tálimgerlerdi biriktirip keledi.
