Almaty Ońtústik Koreıanyń MBC (Munhwa Broadcasting Corporation) ulttyq telearnasyndaǵy mıllıondaǵan kórermen tamashalaıtyn «I Live Alone» tanymal shoýynyń jańa shyǵarylymynda kórsetildi, - dep habarlaıdy alnews.
Qazaqstanǵa arnalǵan túsirilim Almaty qalasy Týrızm basqarmasynyń qoldaýymen uıymdastyrylyp, arnaıy shyǵarylym 2026 jyly 14 tamyzda efırge shyqty.
Shyǵarylymnyń basty keıipkeri – tanymal ońtústikkoreıalyq telejúrgizýshi ári komık, baǵdarlamanyń júrgizýshileriniń biri Chon Hen-mý (Jun Hyun-moo). Almatyǵa sapary barysynda ol halyqaralyq áýejaıda, Kóktóbede, Kók bazarda, Arbatta jáne Qaıyńdy kólinde bolyp, qalanyń tynys-tirshiligimen tanysty. Osylaısha baǵdarlamada Almatynyń qalalyq atmosferasy, gastronomıasy, jergilikti mádenıeti men tabıǵı kórikti jerleri kórsetildi.
«I Live Alone» – Ońtústik Koreıadaǵy eń tanymal oıyn-saýyq baǵdarlamalarynyń biri. Chon Hen-mý sıaqty tanymal tulǵanyń qatysýy shyǵarylymǵa degen qyzyǵýshylyqty odan ári arttyra tústi. Onyń áleýmettik jelidegi paraqshalaryna 800 myńnan astam adam jazylǵan.
Televızıalyq kórsetilimnen keıin baǵdarlama sıfrlyq platformalarda da aýdıtorıa jınaýdy jalǵastyrdy. 3 mıllıonǵa jýyq oqyrmany bar MBC-diń resmı YouTube-arnasynda jarıalanǵan Almatyǵa saıahat týraly beınejazba qazirdiń ózinde 500 myńnan astam qaralym jınady. Kórermender beınerolık astynda qala týraly áserin jazyp, shyǵarylymǵa oń baǵa berip jatyr.
Ońtústik Koreıa Almaty úshin múmkindigi joǵary týrısik naryqtardyń biri sanalady. 2025 jyldyń qorytyndysy boıynsha qalamyzǵa osy elden 23 myńnan astam týrıs kelgen. Sonymen birge Almaty koreıalyq saıahatshylardy ǵana emes, halyqaralyq kontent túsirýge qolaıly alań retinde jergilikti medıany da qyzyqtyryp otyr. Buǵan deıin qalada SBS arnasynyń tanymal «Meniń kishkentaı boıdaq jigitim» shoýynyń arnaıy shyǵarylymy túsirilse, endi Almaty MBC arnasyndaǵy «I Live Alone» baǵdarlamasynda kórsetildi. Bul Almatynyń koreıalyq aýdıtorıa arasynda týrısik baǵyt ári halyqaralyq medıajobalar úshin tartymdy alań retindegi áleýetin de aıqyndaı túsedi.
