Almaty mýzeıinde Qazaqstannyń Halyq jazýshysy, Eńbek Eri, aqyn, memleket jáne qoǵam qaıratkeri Oljas Súleımenovtiń 90 jyldyǵyna arnalǵan «Taýlardy alasartpaı, dalany asqaqtatqan…» atty kórme saltanatty túrde ashyldy, - dep habarlaıdy alnews.
Kórme Almaty qalasy ákimdiginiń qoldaýymen uıymdastyryldy. Ony Almaty qalasy mýzeıler birlestigi IýNESKO qamqorlyǵyndaǵy Mádenıetterdi jaqyndastyrý halyqaralyq ortalyǵymen birlesip ótkizdi.
Ekspozısıa kelýshilerdi aqynnyń shyǵarmashylyq murasy men qoǵamdyq qyzmetimen tanystyrady. Kórmege Oljas Súleımenovtiń jeke zattary, qoljazbalary, marapattary, kitaptary, arhıvtik qujattary men sırek kezdesetin fotosýretteri qoıylǵan.
Kórmeniń erekshe jádigerleriniń biri – aqynnyń óz qolymen jazylǵan, kópshilikke keńinen tanymal «Azıa» kitabynyń alǵashqy nusqasynan alynǵan úzindiler.
Sonymen qatar ekspozısıada Oljas Súleımenovtiń antıadrolyq qozǵalystyń qalyptasýyna qosqan qoǵamdyq úlesi de kórinis tapqan. Bul taqyryp Semeı ıadrolyq polıgonynyń jabylǵanyna 35 jyl tolýyna oraı usynylyp otyr.
Kórmeniń ashylý saltanatynda Qazaqstan Jazýshylar odaǵynyń tóraǵasy, «Qurmet» ordeniniń ıegeri Mereke Ábdeshuly kórmeniń aqynnyń shyǵarmashylyq murasy men azamattyq ustanymyn tanytýdaǵy mańyzyna toqtaldy.
«Kórmeni tamashalap júrip, Oljas Súleımenovtiń ózin kórgendeı bolamyz. Tipti, onyń sýretine qaraǵannyń ózinde, óz bolashaǵyńdy, aldyńdaǵy úlken maqsatyńdy kórgendeı áser alasyń», – dedi Mereke Ábdeshuly.
Saltanatty is-sharaǵa Almaty qalasy Mádenıet basqarmasy basshysynyń orynbasary Arman Beısenbaıuly, Qazaqstan Jazýshylar odaǵynyń tóraǵasy Mereke Ábdeshuly, IýNESKO qamqorlyǵyndaǵy Mádenıetterdi jaqyndastyrý halyqaralyq ortalyǵy dırektorynyń orynbasary Igor Vladımırovıch, fılosofıa ǵylymdarynyń doktory, akademık Nur Serikuly, tarıh ǵylymdarynyń doktory Zaınıdın Karpekuly, Oljas Súleımenovtiń qaryndasy Jibek Ábdýálıeva, shyǵarmashylyq zıaly qaýym ókilderi, mádenıet jáne óner qaıratkerleri, BAQ ókilderi, sondaı-aq Almaty turǵyndary men qala qonaqtary qatysty.
«Taýlardy alasartpaı, dalany asqaqtatqan…» kórmesi eki apta boıy Almaty mýzeıinde ótedi.
Mekenjaıy: Almaty qalasy, Qabanbaı batyr kóshesi, 132.
