Almaty men Shanhaı erekshe qajettiligi bar azamattarǵa medısınalyq jáne áleýmettik ońaltý, jumyspen qamtý jáne jan-jaqty qoldaý kórsetý baǵyttaryndaǵy tájirıbe almasýdy kúsheıtpek, - dep habarlaıdy alnews.
Osy maqsatta Almatyǵa Shanhaıdyń «Ianchjı» ońaltý aýrýhanasy, Jumyspen qamtýǵa járdemdesý ortalyǵy jáne erekshe qajettiligi bar balalarǵa arnalǵan ońaltý ortalyǵynyń ókilderi keldi.
Jumys sapary barysynda delegasıa №4 qalalyq klınıkalyq aýrýhana janyndaǵy Óńirlik travmatologıa jáne ortopedıa ortalyǵyna baryp, tirek-qımyl apparaty aýrýlary men jaraqattary bar naýqastarǵa medısınalyq kómek kórsetý jáne ońaltý tásilderimen tanysty.
Kelesi nysan «Meıirim» ońaltý ortalyǵy boldy. Onda delegasıa balalar men olardyń otbasylaryn keshendi ońaltý jáne kúndelikti ómirde qoldaý tájirıbesimen tanysty.
Yntymaqtastyqtyń taǵy bir mańyzdy baǵyty – jumyspen qamtý. Almaty qalasy Eńbek mobıldiligi ortalyǵynda qonaqtarǵa kásibı baǵdar berý, jumysqa ornalasýǵa járdemdesý jáne azamattarǵa qoldaý kórsetý tetikteri tanystyryldy. Atap aıtqanda, adamnyń jumys ornyna beıimdelýine kómektesetin Job Coach tásili týraly aqparat berildi.
Jumys saparynyń qorytyndysy boıynsha medısınalyq-áleýmettik mekemelerdiń, Erte aralasý ortalyǵynyń, qoǵamdyq birlestikter men Almatynyń sarapshylyq qaýymdastyǵy ókilderiniń qatysýymen keńeıtilgen kezdesý ótti.
Kezdesý barysynda taraptar yntymaqtastyq týraly memorandým ázirleýge kelisti. Qujat tájirıbe almasýdy jolǵa qoıýdy, birlesken bastamalardy júzege asyrýdy jáne áleýmettik ońaltý salasyndaǵy mamandardyń biliktiligin arttyrýdy kózdeıdi.
Sonymen qatar Almatydaǵy medısınalyq-áleýmettik mekemeler qyzmetkerleri úshin Shanhaıdyń «Ianchjı» ońaltý aýrýhanasynda taǵylymdamadan ótý múmkindigin qarastyrý josparlanyp otyr. Birlesken semınarlar men praktıkalyq oqytý baǵdarlamalaryn ótkizý de kózdelgen.
Bul yntymaqtastyq ońaltýdyń zamanaýı tásilderin tájirıbege engizýge, mamandardyń kásibı tájirıbesin arttyrýǵa jáne múgedektigi bar adamdar men erekshe qajettiligi bar balalardy tárbıelep otyrǵan otbasylarǵa kórsetiletin qyzmetterdiń sapasyn jaqsartýǵa baǵyttalǵan.
