Almaty qalasynda komúnıtı-ortalyqtar jastardy biriktiretin zamanaýı keńistikter retinde qarqyndy damyp keledi. Búginde bul ortalyqtar bilim alý, shyǵarmashylyqpen aınalysý, ózin-ózi damytý jáne qoǵamdyq belsendilikti arttyrýǵa arnalǵan mańyzdy platformalarǵa aınaldy.
Qalanyń barlyq aýdandarynda ornalasqan komúnıtı-ortalyqtarda almatylyq jastar tegin bilim berý kýrstaryna, sheberlik sabaqtaryna, kásipkerlik pen medıasaýattylyq boıynsha trenıńterge qatysyp, volonterlik jobalarǵa, ekologıalyq aksıalarǵa, mádenı jáne sporttyq is-sharalarǵa belsene aralasýda. Munda jastardyń soft skills daǵdylaryn damytýǵa, bastamalaryn qoldaýǵa jáne áleýmettik mańyzy bar jobalarǵa tartýǵa erekshe kóńil bólinedi.
Komúnıtı-ortalyqtar jastar, sarapshylar jáne qalalyq qurylym ókilderi arasyndaǵy ashyq dıalog alańyna aınalýda. Kezdesýler, forsaıt-sessıalar men ashyq talqylaýlar barysynda jastar Almatynyń damýyna qatysty óz usynystaryn bildirip, startap jobalaryn tanystyryp, qalalyq kún tártibin qalyptastyrýǵa atsalysýda. Bul tásil jastardyń áleýetin ashýmen qatar, olardy qalany basqarý úderisterine tartýǵa múmkindik beredi.
Sonymen qatar volonterlik qozǵalysty damytý — ortalyqtardyń negizgi baǵyttarynyń biri. Komúnıtı-ortalyqtar bazasynda eko-belsendiler, medıa-volonterler men qoǵamdyq kómekshiler komandalary qurylyp, olar qalalyq senbilikterge, profılaktıkalyq reıdterge, áleýmettik jáne ekologıalyq bastamalarǵa qatysýda. Bul jastar arasynda azamattyq jaýapkershilik pen belsendi ómirlik ustanymdy qalyptastyrýǵa yqpal etedi.
Zamanaýı ınfraqurylym, ashyq atmosfera jáne túrli formattaǵy baǵdarlamalar komúnıtı-ortalyqtardy mektep oqýshylary, stýdentter jáne jumys isteıtin jastar arasynda keńinen tanymal etýde. Munda ár jas óz qyzyǵýshylyǵyna saı baǵytty — kreatıvti ındýstrıalardan bastap IT, sport pen qoǵamdyq qyzmetke deıin taba alady.
Komúnıtı-ortalyqtar jelisiniń damýy Almaty qalasynyń jastar saıasatyna júıeli kózqarasyn kórsetedi. Bul – jastardyń ózin-ózi júzege asyrýyna qolaıly orta qalyptastyrý, talanttardy qoldaý jáne belsendi azamattar qaýymdastyǵyn damytýǵa baǵyttalǵan mańyzdy qadam. Búginde bul keńistikter ıdeıalar týyndaıtyn, áleýmettik baılanystar nyǵaıa túsetin jáne Almatyny jastar úshin múmkindikter qalasy retinde tanytatyn basty tartylys núktelerine aınalyp otyr.
