Almaty qalasynyń Komýnaldyq ınfraqurylym jáne turǵyn úı ınspeksıasy basqarmasy «Almaty jastary» baǵdarlamasy boıynsha ótinim qaraýdy qorytyndylady, - dep habarlaıdy alnews.
Ótinimder 1-15 maýsym aralyǵynda kezekte.kz portaly arqyly qabyldanyp, baǵdarlamaǵa qatysý úshin barlyǵy 5 363 ótinim tústi.
Qujattardy qaraý barysynda keıbir qatysýshylardyń ótinim berý kezinde qyzmet salasyn qate kórsetkeni anyqtaldy. Bul tehnıkalyq sıpattaǵy qatelik bolǵandyqtan, olardyń baǵdarlamaǵa qatysýyna kedergi keltirgen joq.
Qujattardy tekserý nátıjesinde 3 968 ótinim maquldandy. Bıyl baǵdarlama aıasynda keminde 1 650 turǵyn úı nesıesin berý josparlanǵan. Dál osy mólsherdegi qatysýshylar tólem qabilettiligin rastaý úshin «Otbasy bank» AQ-na joldama alady. Kezektiń aldyn alý maqsatynda joldamalar kezeń-kezeńimen apta saıyn 550 qatysýshyǵa beriledi.
Tólem qabilettiligi rastalǵannan keıin qatysýshylarǵa 45 kúntizbelik kún ishinde bastapqy nemese qaıtalama turǵyn úı naryǵynan baspana tańdap, 20 mln teńgege deıingi turǵyn úı nesıesin rásimdeýge múmkindik beriledi.
Eger keıbir qatysýshylar tólem qabilettiligin rastaı almasa nemese belgilengen merzimde turǵyn úı tańdap úlgermese, joldama berý kezegi oń qorytyndy alǵan kelesi úmitkerlerge ótedi. Bul baǵdarlamaǵa bólingen qarajattyń tolyq ári tıimdi ıgerilýin qamtamasyz etedi.
Qujattardy qaraý nátıjesinde 1 395 ótinish berýshiniń qujattary baǵdarlama talaptaryna sáıkes kelmedi. Buǵan olardyń jeke menshiginde turǵyn úıiniń bolýy, sońǵy bes jyl ishinde turǵyn úıdi ıelikten shyǵarýy nemese sońǵy alty aıda mindetti zeınetaqy jarnalarynyń aýdarylmaýy sebep boldy.
Ótinimi maquldanǵan jáne ótinimi maquldanbaǵan úmitkerlerdiń tizimi kezekte.kz portalyndaǵy ALMATY JASTARY servısiniń «Turǵyn úı qyzmetteri» bóliminde jarıalanady.
