Almaty jarty jylda 1 trln teńgeden astam ınvestısıa tartty

Almaty Qazaqstandaǵy ınvestısıa tartý boıynsha eń tartymdy óńirlerdiń biri retindegi mártebesin saqtap keledi. Buǵan qalanyń joǵary kadrlyq áleýeti, damyǵan ınfraqurylymy, keń tutyný naryǵy jáne bıznes júrgizýge qolaıly jaǵdaı yqpal etip otyr.
 
Almaty qalasy Kásipkerlik jáne ınvestısıalar basqarmasy ókilderiniń málimetinshe, 2026 jyldyń qańtar-maýsym aılarynda negizgi kapıtalǵa salynǵan ınvestısıa kólemi 1,021 trln teńgege jetti. Investısıanyń naqty kólem ındeksi 104,6% bolyp, megapolıstegi ınvestısıalyq belsendiliktiń turaqty ósimin kórsetti.
 
Investısıalardyń negizgi bóligi ishki kapıtal. Onyń kólemi 870 mlrd teńgege jetse, syrtqy ınvestısıa 151,5 mlrd teńge boldy. Syrtqy ınvestısıanyń ósim qarqyny 112,9%-ǵa jetti.
 
Eń kóp qarjy jyljymaıtyn múlik, kólik jáne qoımalaý, sıfrlyq tehnologıalar men energetıka salalaryna baǵyttaldy. Atap aıtqanda, jyljymaıtyn múlik sektoryna 299 mlrd teńge, kólik jáne qoımalaý salasyna 172,6 mlrd teńge, aqparat jáne baılanys baǵytyna 143,8 mlrd teńge, al energetıka jobalaryna 93,9 mlrd teńge ınvestısıa salyndy.
Ásirese, ınvestorlar eń kóp qyzyǵýshylyq tanytyp otyrǵan salalar qatarynda jyljymaıtyn múlik, logıstıka, sıfrlyq ekonomıka jáne energetıka bar. Bıyl alǵashqy jartyjyldyqta jyljymaıtyn múlik sektoryna 299 mlrd teńge, kólik jáne qoıma salasyna 172,6 mlrd teńge (16,9%), aqparat jáne baılanys baǵytyna 143,8 mlrd teńge (14,1%) ınvestısıa salyndy.
 
Sonymen qatar elektr qýatymen, gazben, býmen, ystyq sýmen jabdyqtaý jáne aýa baptaý júıeleri jobalaryna 93,9 mlrd teńge ınvestısıa baǵyttaldy.
 
Sonymen qatar 2026 jyldyń birinshi toqsanynyń qorytyndysy boıynsha tartylǵan tikeleı sheteldik ınvestısıa kólemi 2,1 mlrd AQSH dollaryna jetti. Qazaqstan Respýblıkasy Ulttyq bankiniń derekterine sáıkes, bul kórsetkish ótken jyldyń osy kezeńimen salystyrǵanda 32,1%-ǵa tómendegen.
 
Soǵan qaramastan Almaty ınvestısıalyq belsendiliktiń joǵary deńgeıin saqtap, elimizdegi kapıtal tartýdyń negizgi ortalyqtarynyń biri bolyp qala beredi. Bıyl qalada jalpy quny 542,8 mlrd teńge bolatyn 35 ınvestısıalyq jobany júzege asyrý josparlanǵan.
 
Jańa jobalar jańa jumys oryndaryn ashýǵa, óndiristik ınfraqurylymdy damytýǵa jáne megapolıs ekonomıkasyn odan ári ártaraptandyrýǵa yqpal etedi.
 
Kásipkerlik jáne ınvestısıalar basqarmasy ókilderiniń málimetinshe, ınvestısıalyq bastamalardy iske asyrý Almatynyń Qazaqstannyń eń iri iskerlik jáne ekonomıkalyq ortalyǵy retindegi pozısıasyn odan ári nyǵaıtyp, óńirlik jáne halyqaralyq deńgeıdegi básekege qabilettiligin arttyrýǵa múmkindik beredi.