Memleket basshysy Qasym-Jomart Toqaevtyń tapsyrmasy boıynsha Almaty ıpodromy qala menshigine qaıtaryldy, - dep habarlaıdy alnews.
Budan bylaı qalalyq ıpodrom tarıhı jáne sporttyq maqsattaǵy birtutas nysan retinde saqtalady. Bul týraly Almaty qalasy Sport basqarmasynyń ókilderi málimdedi.
Almatynyń 2040 jylǵa deıingi Bas josparynda ıpodrom aýmaǵy tıisti fýnksıonaldyq aımaqqa bekitilgen. Ony ózgertý josparda joq. Jer teliminiń de ıpodromdy paıdalaný jáne oǵan qyzmet kórsetýge arnalǵan nysanaly maqsaty saqtalady.
Aldaǵy ýaqytta ıpodromdy keshendi damytý tujyrymdamasy ázirlenedi. Onyń sporttyq qyzmetin qalpyna keltirý, ınfraqurylymyn jańǵyrtý, trıbýnalaryn, at qoralaryn, sport joldaryn jáne ınjenerlik jelilerin jańartý josparlanyp otyr.
Tujyrymdamany ázirleý kezinde zamanaýı sport ınfraqurylymyna qoıylatyn talaptar eskeriledi. Nysan óziniń negizgi maqsatyn jáne qalalyq ári respýblıkalyq jarystar ótkizý múmkindigin saqtaýǵa tıis.
Qazirgi ýaqytta keshen qatty tozyp ketken, sondyqtan ony qalpyna keltirý jumystary kezeń-kezeńimen júrgiziledi.
Almaty ıpodromy 1930 jyly qurylǵan jáne Qazaqstan men Ortalyq Azıadaǵy jylqy sharýashylyǵy men at sportyna arnalǵan baıyrǵy nysandardyń biri sanalady. Onyń aýmaǵy 39,1 gektar. Tarıhı turǵydan ıpodrom shamamen 3 myń kórermenge jáne 300-ge jýyq jylqy ustaýǵa eseptelgen. Kúrdeli jóndeý jumystary 1965 jáne 1985 jyldary júrgizilgen. 1990 jyldardaǵy jekeshelendirý nátıjesinde ıpodrom memlekettik menshikten shyǵaryldy. 2001 jyly «Ipodrom» AQ bankrot bolǵannan keıin múliktik keshen jeke qurylymdarǵa satylyp ketken edi. Bul qoǵam belsendileri, atbegiler men at sporty jankúıerleriniń narazylyǵyn týdyrdy. Ipodromdy qalalyq komýnaldyq menshikke qaıtarý týraly másele qoǵam tarapynan álsin-álsin qozǵalyp júrdi.
Ipodromnyń komýnaldyq menshikke qaıtýy ony kezeń-kezeńimen qalpyna keltirýge jáne Almatyda at sportyn odan ári damytý úshin nysandy saqtap qalýǵa múmkindik beredi.
Jalpy, ıpodromdy qalalyq komýnaldyq qyzmetke qaıtarý prosesi birshama uzaq ýaqytqa sozylyp, tek, bıyl ǵana júzege asty.
