Almaty International Congress and Convention Association (ICCA) qaýymdastyǵynyń jyl saıynǵy reıtıńinde 10 satyǵa joǵary kóterildi. Bul qalanyń kongrester, konferensıalar jáne ózge de iskerlik is-sharalardy ótkizýge qolaıly ortalyq retindegi bedeli artyp kele jatqanyn kórsetedi.
ICCA – iskerlik týrızm ındýstrıasyndaǵy jetekshi halyqaralyq komersıalyq emes qaýymdastyqtardyń biri. Onyń quramyna álemniń 100-ge jýyq elinen 1 100-den astam uıym kiredi. Uıymnyń jyl saıynǵy reıtıńi MICE-týrızmniń damý deńgeıin baǵalaıtyn eń bedeldi halyqaralyq kórsetkishterdiń biri sanalady.
Almaty Tourism Bureau ICCA qaýymdastyǵyna úsh jyldan beri múshe. Bul Almatyǵa halyqaralyq kásibı qaýymdastyqpen, kongres uıymdastyrýshylarymen jáne salanyń jetekshi seriktesterimen tikeleı baılanys ornatýǵa, sondaı-aq qalanyń iskerlik týrızmdegi áleýetin jahandyq deńgeıde tanytýǵa múmkindik berip keledi.
«ICCA músheligi halyqaralyq is-sharalardy uıymdastyrýshylarmen tikeleı jumys isteýge, Almatynyń múmkindikterin álemdik alańdarda tanystyrýǵa jáne qalaǵa jańa kongrester men konferensıalar tartýǵa jol ashady. Bıylǵy reıtıńte 10 satyǵa joǵarylaýymyz Almatynyń halyqaralyq MICE naryǵyndaǵy pozısıasynyń nyǵaıyp kele jatqanynyń aıqyn dáleli», – dedi Almaty Tourism Bureau týrızmdi damytý bóliminiń basshysy Sanjar Kaleshov.
ICCA-nyń 2025 jylǵy málimetine sáıkes, Almatyda ótken halyqaralyq is-sharaǵa qatysqan bir delegattyń ortasha shyǵyny 1 210 AQSH dollaryna jetti. Bul somaǵa qonaq úıde turý, tamaqtaný, kólik jáne ózge de qyzmetterge jumsalǵan qarajat kiredi.
Orta eseppen bir halyqaralyq is-shara qala ekonomıkasyna shamamen 327 myń AQSH dollary kóleminde ekonomıkalyq áser etedi. Al 2025 jyldyń qorytyndysy boıynsha Almatyda ótken ICCA is-sharalarynyń jalpy ekonomıkalyq úlesi shamamen 2,94 mln AQSH dollaryna jetti.
Bul kórsetkishter ICCA-nyń is-sharaǵa qatysýshylardyń tikeleı shyǵyny men olardyń qabyldaýshy qala ekonomıkasyna qosatyn úlesin eskeretin resmı ádistemesi negizinde eseptelgen.
