2026 jyly alǵashqy toǵyz aıda Almaty Azıa elderinde ótken halyqaralyq týrısik kórmelerde bes márte marapattaldy, - dep habarlaıdy alnews.
Osy ýaqyt aralyǵynda qalanyń týrısik sala ókilderi sheteldik seriktestermen 500-den astam iskerlik kezdesý ótkizip, keminde 284 kelisimge qol jetkizdi. Bul týraly Almaty qalasy Týrızm basqarmasynyń ókilderi habarlady.
Qańtar men qyrkúıek aralyǵynda Almatynyń týrısik áleýeti Úndistan, Qytaı, Ońtústik Koreıa, Malaızıa jáne Japonıada, sondaı-aq Gonkongta uıymdastyrylǵan jeti halyqaralyq kórmede tanystyryldy.
Halyqaralyq is-sharalarda Almaty túrli atalym boıynsha úzdikter qatarynan kórindi. Atap aıtqanda, Mýmbaıda qalalyq týrızmdi úzdik ilgeriletkeni úshin, Gýanchjoýda eń tanymal mádenı baǵyt retinde, al Seýlde kórme stendiniń úzdik mazmuny úshin marapattaldy. Gonkongta Almaty stendiniń jumysy arnaıy júldege ıe bolsa, Kýala-Lýmpýrda qalanyń mádenı baǵdarlamasy úzdik dep tanyldy.
Kórmeler aıasynda Almatynyń týrısik kompanıalary sheteldik týroperatorlarmen, áýe tasymaldaýshylarymen, qonaq úı jelilerimen jáne týrısik qaýymdastyqtarmen kelissózder júrgizdi. Kezdesýler barysynda qalanyń týrısik múmkindikterin halyqaralyq naryqta ilgeriletý, jańa baǵyttar ázirleý jáne ózara yntymaqtastyqty keńeıtý máseleleri talqylandy.
Sonymen qatar halyqaralyq kórmelerde Almaty Tourism Day atty Almaty týrızmi kúnderi uıymdastyryldy. Arnaıy is-sharalarda jergilikti kompanıalar qyzmetin sheteldik seriktesterge tanystyryp, birlesken jobalardy júzege asyrý múmkindikterin qarastyrdy.
Almatynyń týrısik áleýetin tanystyrý kezinde mádenı, gastronomıalyq, oqıǵalyq jáne taý týrızmine erekshe nazar aýdaryldy. Sondaı-aq qala men onyń aınalasyndaǵy tabıǵı kórikti jerler sheteldik týrısik naryq ókilderine usynyldy.
Almaty qalasy Týrızm basqarmasynyń málimetinshe, halyqaralyq kórmelerge qatysý Azıa elderiniń týrısik ındýstrıasymen iskerlik baılanysty nyǵaıtýǵa, jańa seriktester tartýǵa jáne Almatyny halyqaralyq týrısik baǵyt retinde keńinen tanytýǵa múmkindik berdi.
