Almatyda Naýryz meıramy aıasynda Tazarý kúnine oraı jalpyqalalyq senbilik ótti. Ekologıalyq aksıaǵa qala ákimi Darhan Satybaldy qatysty.
Negizgi is-sharalar 23 naýryz Naýryzbaı aýdanynda — J. Jıembaev atyndaǵy Qazaq ósimdik qorǵaý jáne karantın ǵylymı-zertteý ınstıtýty mańyndaǵy skverde ótti. Qala ákimi turǵyndarmen birge aýmaqty kórkeıtý jumystaryna qatysty.
Ákimniń aıtýynsha, bul bastama Memleket basshysynyń bastamasymen júzege asyrylyp jatqan «Taza Qazaqstan» respýblıkalyq baǵdarlamasy aıasynda qolǵa alynǵanyn atap ótti. Shahar basshysy bul naýqan ıgi dástúrge aınalǵanyn jetkizdi.
«Taza Qazaqstan» arqyly biz jastarǵa úlgi kórsetip, tazalyq mádenıetin qalyptastyramyz. Prezıdenttiń bastamasymen bul baǵdarlama elimizdiń barlyq óńirinde júzege asyrylyp jatyr. Bul tek aýlany taza ustaý emes, jalpy mádenıet deńgeıin ózgertý», — dedi Darhan Satybaldy.
Jalpyqalalyq senbilik Almatynyń barlyq aýdanyn qamtyp, 24 oryn ótti. Aksıaǵa 10 myńnan astam adam qatysyp, 2 035 birlik arnaıy tehnıka jumyldyryldy.
Senbilikte 2 myń tekshe metrden astam qoqys shyǵarylyp, 2 010 aǵash pen buta egildi. Sonymen qatar, aýlalar, qoǵamdyq keńistikter, aryq jelileri jáne irgeles aýmaqtar tazartyldy.
Tazalyq jáne kóriktendirý jumystary Alataý aýdanynda — Saıaly shaǵynaýdanynda, Almaly aýdanynda — Gandı saıabaǵynda, Áýezov aýdanynda — Aqsaı-1A shaǵynaýdanynda jáne Saıran kóli aýmaǵynda, Bostandyq aýdanynda — Úlken Almaty ózeniniń jaǵalaýynda, Jetisý aýdanynda — Jangeldın skverinde, Medeý aýdanynda — Esentaı ózeni boıynda, Túrksib aýdanynda — Qaırat shaǵynaýdanynda júrgizildi.
İs-sharaǵa qala turǵyndary, eriktiler men jastar belsendi qatysty.
Tazarý kúni — Naýryznama onkúndigin qorytyndylaıtyn kún. Ol ekologıalyq mádenıetti qalyptastyrýǵa, qorshaǵan ortaǵa janashyrlyqpen qaraýǵa jáne qalalyq ortany damytýǵa baǵyttalǵan.
