Almaty qalasynyń ákimi Darhan Satybaldy Bilim kúni Alataý aýdanyndaǵy 2 myń oqýshyǵa arnalǵan №230 «Keleshek mektebiniń» saltanatty ashylýyna qatysyp, ustazdar men oqýshylardy, ata-analardy jańa oqý jylynyń bastalýymen quttyqtady, - dep habarlaıdy alnews.
Qala ákimi óz sózinde Memleket basshysy Qasym-Jomart Toqaevtyń jýyrda ótken ustazdardyń Tamyz konferensıasynda Ádiletti, Qýatty, Qaýipsiz ári Taza Qazaqstannyń tiregi bolatyn jaýapty ári adal azamattardy tárbıeleý barshanyń ortaq mindeti ekenin atap ótkenine toqtaldy.
«Memleket basshysynyń tapsyrmasyna sáıkes elimizde «Keleshek mektepteri» ulttyq jobasy aıasynda 460 myń oqýshyǵa arnalǵan 217 zamanaýı mektep salyndy. Almaty shahary – osy úlken ózgeristerdiń aldyńǵy qatarynda tur», - dedi qala basshysy.
Buǵan deıin qalada jalpy syıymdylyǵy 24 300 oryndyq 14 «Keleshek mektebi» qoldanysqa berilse, dál búgin 10 500 oqýshyǵa arnalǵan 7 «Keleshek mektebi» jáne «Zerdeli» shaǵynaýdanyndaǵy 550 oryndyq jalpy bilim beretin mektep esigin aıqara ashty.
Sonymen qatar qaıta jańǵyrtýdan ótken №160 mektep, buzylyp qaıta qurylǵan 340 oryndyq №15 ınternat, sondaı-aq qosymsha qurylys júrgizilgen №112 jáne №174 mektepter qaıta qoldanysqa berildi. Atalǵan nysandardyń paıdalanýǵa berilýi nátıjesinde 1 015 qosymsha oqýshy orny ashylyp, qala boıynsha jańadan engizilgen oqýshy oryndarynyń jalpy sany 12 065-ke jetti.
Alataý aýdanynda 3 jańa nysan ashyldy. Sonyń biri – 2 myń oqýshyǵa arnalǵan №230 «Keleshek mektebi».
Jańa oqý jylynda mektep avtobýstary 11 496 balany tasymaldaıdy. Búginde megapolıstiń bilim berý júıesinde 42 000-nan astam pedagog eńbek etedi. Al 32 000-nan astam bala búgin 1-synypqa qadam basyp, mektep tabaldyryǵyn alǵash attady.
Darhan Satybaldy ustazdardyń jas urpaq tárbıesindegi aıryqsha ornyna toqtalyp, olardyń adal qyzmetine rızashylyǵyn bildirdi. Sonymen qatar oqýshylardy bilimge umtylýǵa, izdenýge jáne jańa ıdeıalar bastaýǵa shaqyryp, ata-analarǵa mektep pen otbasy arasyndaǵy ózara senim men birliktiń mańyzyn atap ótti.
