Almaty ákimi Darhan Satybaldy kóshelerdi kórkeıtý jáne qoǵamdyq keńistikterdi damytý jobalarynyń júzege asyrylý barysy boıynsha keńes ótkizdi, - dep habarlaıdy alnews.
Jıynda jumystardy uıymdastyrý, belgilengen merzimdi saqtaý, qaýipsizdik talaptary men jobalardyń sapaly oryndalýyna basa nazar aýdaryldy.
Darhan Satybaldynyń aıtýynsha, bıyl qalada kósheler men jaǵalaýlardy kórkeıtý, jańa qoǵamdyq keńistikter qurý, turǵyn úılerdiń qasbetin jóndeý jáne aýmaqtardy kógaldandyrý boıynsha aýqymdy jumystar júrgizilip jatyr.
Onyń aıtýynsha, turǵyndar jalpy júrgizilip jatqan jumystarǵa túsinistikpen qaraıdy. Óıtkeni qalalyq ınfraqurylymdy jańartý qajettigin kórip otyr. Alaıda qurylys jumystarynyń qalaı uıymdastyrylǵanyna qatysty máseleler bar.
«Alaıda turǵyndar jumystardyń uıymdastyrylýyna qatysty narazylyq bildirip otyr. Atap aıtsaq, únemi shań-tozań bolady, túngi ýaqytta shý shyǵady, jumys júrgizilip jatqan aýmaqta qaýipsiz ótkelder joq. Keıbir jaǵdaıdy túsinýge bolady. Biraq kórip otyrǵanymyzdaı, bul júıeli túrde qaıtalanyp otyrǵan zańbuzýshylyqtar. Demek, jumysty uıymdastyrýda kemshilikter bar», – dedi Almaty ákimi.
Shahar basshysy kórkeıtý kezinde aǵashtardyń zaqymdaný jaǵdaıyna da toqtaldy.
«Mysaly, aryq naýalaryn aýystyrý jáne sýarý júıelerin júrgizý kezinde qoldanystaǵy jasyl jelekterdiń tamyrlary zaqymdalady. Buǵan jol berýge bolmaıdy», – dedi Darhan Satybaldy.
Almaty ákimi Qala qurylysyn baqylaý basqarmasyna jumystardyń sapasy men oryndalý merzimin, qaýipsizdik talaptarynyń saqtalýyn jáne qurylys úderisteriniń uıymdastyrylýyn tekserýdi tapsyrdy. Ásirese, kóshelerdi «qasbetten qasbetke deıin» qaǵıdaty boıynsha keshendi kórkeıtý jobalaryna erekshe nazar aýdarýdy mindettedi.
Sonymen qatar «Eco Almaty» JSHS men polısıaǵa kórkeıtý qaǵıdalary buzylǵan jaǵdaıda, onyń ishinde shań-tozań, qurylys qaldyqtary jáne jasyl jelektiń zaqymdanýyna baılanysty zań buzýshylyqtar anyqtalsa, ákimshilik sharalar qabyldaý tapsyryldy.
«Merdigerler jumystardyń sapasy men durys uıymdastyrylýyna jaýapty bolýy kerek. Kóriktendirý qalalyq ortany jaqsartýǵa baǵyttalýǵa tıis, turǵyndarǵa qosymsha qıyndyq týǵyzyp, qoldanystaǵy ınfraqurylym men jasyl jelekke zıan keltirmeýi kerek. Basqarmalar turǵyndardyń shaǵymdaryna jaı ǵana jaýap berip qoımaı, naqty sharalar qabyldaýy qajet», – dedi Almaty ákimi.
