Almaty ákimi Darhan Satybaldy Vetnamnyń ROX Group iri ınvestısıalyq tobyna kiretin ROX Living Global developerlik kompanıanyń ókilderimen kezdesti, - dep habarlaıdy alnews.
Kezdesýde Almaty Downtown jańa iskerlik aýdanyn damytýǵa ROX Group kompanıasynyń qatysý múmkindikteri qarastyryldy.
Kezdesý barysynda ROX Living Global kompanıasynyń bas dırektory Chan Thı Mı Lok bastaǵan delegasıa turǵyn úı jáne komersıalyq jyljymaıtyn múlik nysandaryn qamtıtyn kópfýnksıonaldy keshen salý jónindegi usynysyn tanystyrdy.
Joba tujyrymdamasy turǵyn úılermen qatar keńselerdi, saýda oryndaryn, bilim berý jáne medısınalyq mekemelerdi, sport nysandary men qoǵamdyq keńistikterdi qamtıdy. Sondaı-aq, aýmaqty kógaldandyrýǵa, júrginshilerge qolaıly orta qalyptastyrýǵa jáne qoǵamdyq keńistikterdi kórkeıtýge basymdyq berilgen.
Darhan Satybaldy Almatynyń damýdyń polıortalyq úlgisine kóship jatqanyn, sonyń aıasynda jańa iskerlik ortalyqtar qalyptasatynyn atap ótti. Solardyń biri Almaty Downtown bolmaq.
«Kópfýnksıonaldy keshen salý jónindegi bastamańyzdy qoldaımyz. Óz tarapymyzdan ákimdik jobany júzege asyrýǵa jan-jaqty qoldaý kórsetedi. Jobany is júzinde iske asyrý kezeńine múmkindiginshe tezirek kóshedi dep senemiz», – dedi Almaty ákimi.
1996 jyly qurylǵan ROX Group jyljymaıtyn múlik, qarjy, energetıka jáne qonaq úı bıznesi salalarynda jumys isteıdi. Toptyń ınvestısıalyq portfelinde álemniń 12 elindegi 100-den astam joba bar. Kompanıanyń Ortalyq Azıadaǵy iri jobalarynyń biri Bishkek qalasynda júzege asyrylyp jatyr.
