Almaty ákimi Darhan Satybaldy jumys sapary barysynda Úlken Almaty kóli (ÚAK) mańyndaǵy týrısik ınfraqurylymdy damytýǵa baǵyttalǵan jobalarmen tanysty, - dep habarlaıdy alnews.
Sapar kezinde qala basshysyna «Almaty – Kosmostansıa» avtojolyn, sondaı-aq «Alma-Arasan» shıpajaıyna aparatyn kireberis joldy kúrdeli jóndeý jobasy tanystyryldy. Joba aıasynda uzyndyǵy 26,5 shaqyrym jol tolyq jańartylyp, avtoturaq salynady. Bul kólik qozǵalysynyń qaýipsizdigin arttyryp, atalǵan aýmaqtaǵy kólik júktemesin azaıtýǵa múmkindik beredi.
Sonymen qatar ákimge Úlken Almaty kóline aparatyn aspaly jol stansıasynyń tujyrymdamasy kórsetildi. Joba ekologıalyq taza kólik túrin damytýǵa, shahardyń eń tanymal týrısik oryndarynyń birine qoljetimdilikti arttyrýǵa jáne tabıǵı aýmaqqa túsetin antropogendik júktemeni azaıtýǵa baǵyttalǵan.
Sapar barysynda Úlken Almaty kóline aparatyn júrginshiler soqpaǵyn kórkeıtý jobasyna da erekshe nazar aýdaryldy. Darhan Satybaldy marshrýt boıymen júrip ótip, qurylys-montaj jumystary bastalǵan ýchaskeni aralap kórdi.
Joba aıasynda uzyndyǵy 5,3 shaqyrym bolatyn zamanaýı týrısik soqpaq salynady. Onda kelýshilerdiń qaýipsiz ári jaıly qozǵalysy úshin barlyq qajetti ınfraqurylym qarastyrylady. Marshrýt boıyna baǵyttaýshy belgiler men aqparattyq stendter ornatylyp, demalys oryndary, sholý alańdary, fotoaımaq, kúrdeli ýchaskelerde baspaldaqtar men ótkelder, sondaı-aq shaǵyn sáýlettik nysandar ornatylady.
Jobany júzege asyrý týrıser legin retteýge, marshrýttyń qaýipsizdigin qamtamasyz etýge, tabıǵı ekojúıege túsetin salmaqty azaıtýǵa jáne İle Alataýy memlekettik ulttyq tabıǵı parkiniń aýmaǵynda zamanaýı týrısik ınfraqurylym qurýǵa múmkindik beredi.
Jumys saparynyń sońynda Almaty ákimi barlyq jobany sapaly ári belgilengen merzimde aıaqtaýdy tapsyrdy. Sondaı-aq, ekologıalyq talaptardyń qatań saqtalýy, tabıǵı landshafttyń buzylmaýy jáne týrısik ınfraqurylymdy damytý barysynda qaýipsizdik pen tabıǵı murany saqtaý basty basymdyq bolýy kerektigin atap ótti.
