Almaty ákimi Darhan Satybaldy turǵyn úı jaǵdaıyn jaqsartýǵa muqtaj, baspana kezeginde turǵan azamattarǵa jańa páterlerdiń kiltin tabystady, - dep habarlaıdy alnews.
Turǵyn úıdi bólýdiń ekinshi kezeńi aıasynda «Altynaı» turǵyn úı keshenindegi 210 páter qala turǵyndarynyń ıgiligine berildi.
İs-shara barysynda qala ákimi turǵyn úıdiń qoljetimdiligin arttyrý jáne áleýmettik ádildikti qamtamasyz etý Memleket basshysy Qasym-Jomart Toqaevtyń áleýmettik saıasatyndaǵy mańyzdy baǵyttardyń biri ekenin atap ótti.
«Memlekettik qoldaý eń aldymen shyn máninde kómekke muqtaj azamattarǵa baǵyttalýǵa tıis. Sonymen birge turaqty tabysy bar eńbek etetin turǵyndarǵa eńbeginiń nátıjesinde baspana alýǵa múmkindik jasaý mańyzdy», – dedi Darhan Satybaldy.
Almaty ákimdigi «Otbasy banki» AQ-men birlesip, 4 myńnan astam páterdi kezeń-kezeńimen bólýdi jalǵastyrýda. Birinshi kezeń aıasynda 885 páter berilse, ekinshi kezeńde taǵy 1 832 páter úlestiriledi. Sonymen qatar «Jumys isteıtin jastar» baǵdarlamasy aıaqtalǵannan keıin bosap qalǵan 1 myńnan astam páter turǵyn úı kezeginde turǵan azamattarǵa beriledi. Taǵy 594 páter nesıe sharttarymen usynylady.
Páterlerdi bólý boıynsha konkýrstar qyrkúıek aıynyń basynan bastap kezeń-kezeńimen ótkiziledi. Bul rette azamattardyń turǵyn úı kezegine qoıylǵan kúni eskeriledi. Bul baspanany bólýdiń júıeliligi men ashyqtyǵyn qamtamasyz etýge múmkindik beredi.
Qoldanystaǵy memlekettik qoldaý tetikteri aıasynda tabysy tómen azamattarǵa jaldamaly turǵyn úı beriledi. Al turaqty tabysy men tólem qabileti bar turǵyndarǵa nesıege beriletin turǵyn úı jáne jeńildetilgen ıpotekalyq baǵdarlamalar qoljetimdi.
