Almaty qalasynyń ákimi Darhan Satybaldy Naýryzbaı aýdanyn jumys sapary barysynda aralap, «Almaty Tazalyq» MKK-niń jańartylǵan óndiristik bazasyna bardy, - dep habarlaıdy alnews.
Shahar basshysy arnaıy tehnıkalardy qarap, qyzmetkerlerdiń eńbek jaǵdaıymen tanysyp, kásiporyn ujymymen kezdesti.
Aýmaǵy 2 gektar bolatyn óndiristik baza Baısultanov kóshesinde ornalasqan. Munda 352 adam eńbek etedi jáne 66 arnaıy tehnıka, onyń ishinde jolǵa qyzmet kórsetetin 14 ámbebap mashına bar.
Kásiporyn aýmaǵynda 12,5 myń sharshy metr asfáltbeton jabyny tóselip, kóktaıǵaqqa qarsy materıaldardy saqtaýǵa arnalǵan alań jabdyqtaldy. Sondaı-aq kógaldandyrý jumystary júrgizilip, bazanyń ınfraqurylymy jańartyldy.
Qyzmetkerlermen kezdesýde Darhan Satybaldy komýnaldyq qyzmetterdiń sapaly jumysy jumysshylardyń eńbek jaǵdaıyna tikeleı baılanysty ekenin atap ótti.
«Qyzmetkerlerge laıyqty eńbek jaǵdaıyn jasaýymyz kerek. Qajetti jaǵdaı jasalmasa, jumysty sapaly oryndaýdy qalaı talap etemiz? Eń aldymen, qalamyzdyń tazalyǵyn kún saıyn qamtamasyz etip júrgen adamdardyń eńbegin qurmetteýimiz qajet», – dedi qala ákimi.
Kezdesý barysynda qala kóshelerin kútip ustaý, tazalyq jumystaryn uıymdastyrý jáne komýnaldyq qyzmet kórsetý sapasyna erekshe nazar aýdaryldy.
«Tazalyq birinshi orynda turýy kerek. Tazalyq, tártip pen kórkeıtý qalanyń jalpy kelbetin qalyptastyrady. Basqa elge nemese qalaǵa barǵanda, eń aldymen, onyń qanshalyqty taza ekenine nazar aýdaramyz. Bul qorshaǵan ortany qalaı qabyldaıtynymyzǵa jáne oǵan degen kózqarasymyzǵa áser etedi. Tazalyq joq jerde tártip te bolmaıdy. Sondyqtan bul jumys turaqty ári júıeli túrde júrgizilýi kerek», – dedi Darhan Satybaldy.
Qala ákimi Memleket basshysy Almatyny retke keltirý mindetin qoıǵanyn da jetkizdi. Osyǵan baılanysty qalany kórkeıtý jáne tazalyq saqtaý jumystary jalǵasady. Al komýnaldyq qyzmetter bul mindetterdiń júıeli ári sapaly oryndalýyn qamtamasyz etýge tıis.
Qazirgi tańda «Almaty Tazalyq» kásipornynyń avtoparkinde 1 017 tehnıka bar. Qysqy tazalyq jumystaryna 830 tehnıka qarastyrylǵan. Onyń ishinde jyl boıy paıdalanylatyn 700 mashına jáne qysqy jumystarǵa arnalǵan 130 arnaıy tehnıka bar. Al qalǵan 187 tehnıka jaz mezgilinde qoldanylady.
Bıyl kásiporyn qosymsha 200 arnaıy tehnıka satyp alyp jatyr. Sonyń nátıjesinde avtopark quramyndaǵy tehnıkanyń jalpy sany 1 217-ge jetedi.
