Almaty ákimi Darhan Satybaldynyń tapsyrmasymen qurylǵan úlestik qatysý máselesi jónindegi vedomstvoaralyq komısıa birneshe turǵyn úı kesheni úleskerlerdiń múddesin qorǵaý baǵytynda jumys júrgizip jatyr, - dep habarlaıdy alnews.
Atap aıtqanda, Esentai City turǵyn úı kesheniniń jyljymaıtyn múlkine salynǵan tyıymdy alyp tastaý jáne qurylysty jalǵastyrý máselesi sheshimin tapty. Al «Dostar Delúks» turǵyn úı kesheniniń úleskerlerine keltirilgen zalaldy óteý tetigi menshik ıeleriniń bastamashyl tobyna usynyldy.
Monblanc turǵyn úı kesheniniń qurylysyn jalǵastyrýǵa nıetti ınvestor tabyldy. Ol jer telimin satyp alyp, úleskerlerdiń shyǵynyn óteýge daıyn. Qazir ınvestor men úleskerler arasynda tıisti kelisim ázirlenip jatyr.
Zańsyz salynǵan Pine Hill jáne Sky Club turǵyn úı keshenderiniń qurylys salýshylaryna qatysty qylmystyq ister tergelip jatyr. Vedomstvoaralyq komısıa ınvestormen kelisimge kelgen. Jer telimderine salynǵan tyıym alynyp, joǵalǵan qujattar qalpyna keltirilgennen keıin ýchaskeler ınvestorǵa beriledi. Osydan soń ol úleskerler aldyndaǵy bereshekti óteý mindettemesin moınyna alady.
Qazir komısıa Shveısarıa, Silver Hills jáne basqa da problemalyq turǵyn úı kesheniniń úleskerlerine qatysty máselelerdi sheshý joldaryn qarastyryp jatyr. Bul nysandar boıynsha qylmystyq isterdi tergeýdiń aıaqtalýy kútilip otyr.
Qala basshysy bekitken vedomstvoaralyq komısıanyń quramyna quqyq qorǵaý organdarynyń, jergilikti atqarýshy organdardyń jáne basqa da memlekettik mekemelerdiń ókilderi engen.
Buǵan deıin qalalyq máslıhat otyrysynda Qala qurylysyn baqylaý basqarmasynyń basshysy Oljas Tólebaev problemalyq turǵyn úı keshenderine qatysty komısıa jumysynyń tártibin túsindirgen bolatyn.
«Árbir problemalyq nysan boıynsha qurylysty aıaqtaýdyń naqty tetigi bekitilip, operator men iske asyrý merzimi aıqyndalady. Komısıa sheshimi iske tartylǵan barlyq memlekettik organ úshin mindetti bolady. Bul uzaqqa sozylatyn kelisý rásimderin qysqartyp, naqty nátıjege qol jetkizýge múmkindik beredi. Iaǵnı, qurylysty aıaqtaý nemese úleskerlerge kómektesýdiń balama joldaryn usyný máselesi sheshiledi», — dedi basqarma basshysy.
Bastapqy naryqtan jyljymaıtyn múlik satyp almas buryn qurylys salýshynyń barlyq qajetti qujaty bar ekenine kóz jetkizýdi suraımyz. Sondaı-aq nysannyń mártebesin Qala qurylysyn baqylaý basqarmasynyń +7 705 89 66 000 nómirindegi anyqtamalyq WhatsApp arnasy arqyly tekserýge bolady.
Jumys ýaqyty: dúısenbi-juma, saǵat 09:00-den 18:00-ge deıin.
