Almatyda ALMA LOVE 2026 jastar festıvali bastaldy, - dep habarlaıdy alnews.
Festıvál 2 tamyz «Taza Qazaqstan» jalpyulttyq bastamasy aıasynda uıymdastyrylǵan aýqymdy EcoDay ekologıalyq aksıasymen ashyldy. Qalanyń ár aýdanynda bir mezgilde ótken ekologıalyq is-sharaǵa 600-den astam jas qatysty.
Festıváldiń alǵashqy kúni jastar uıymdaryn, eriktilerdi, belsendilerdi jáne qala turǵyndaryn ortaq maqsatqa – ALMA LOVE festıvalin týǵan qalaǵa janashyrlyq tanytýdan bastaýǵa jumyldyrdy. Qatysýshylar aýla men qoǵamdyq keńistikterdi tazalap, ekologıalyq chellendjter uıymdastyrdy, turǵyndarmen kezdesip, qorshaǵan ortaǵa uqypty qaraýǵa, tazalyq saqtaýǵa jáne jaıly qalalyq ortany birlesip qalyptastyrýǵa úndedi.
Ekologıalyq aksıa bıyl «Qala senen bastalady. Gorod nachınaetsá s tebá» ataýymen ótip jatqan festıváldiń mán-mańyzyn aıqyndaıtyn alǵashqy is-shara boldy. Onyń negizgi ıdeıasy – Almatyǵa degen súıispenshilik kúndelikti qarapaıym áreketterden, ıaǵnı qorshaǵan ortaǵa qurmetpen qaraýdan, ózi turatyn aýlaǵa, kóshege jáne aýdanǵa janashyrlyq tanytýdan bastalatynyn kórsetý.
İs-shara sondaı-aq Qazaqstan Respýblıkasy Prezıdentiniń «Taza Qazaqstan» jalpyulttyq bastamasyn qoldaýǵa, ekologıalyq mádenıetti nasıhattaýǵa, erikti qozǵalysyn damytýǵa jáne jastardyń qorshaǵan ortanyń jaı-kúıine degen jeke jaýapkershilik sezimin qalyptastyrýǵa baǵyttalǵan.
Aksıaǵa qatysýshylardyń biri mundaı bastamalar jastardy tek qalany taza ustaýǵa ǵana emes, ortaq qundylyqtar tóńireginde biriktirýge de yqpal etetinin atap ótti.
«Biz festıváldi konsertpen emes, paıdaly ispen bastadyq. Bul týǵan qalaǵa degen súıispenshiliktiń sózben emes, ispen kórinetininiń jaqsy belgisi. Eger ár adam ózi turatyn aýlaǵa nemese kóshege qamqorlyq tanytsa, Almaty áldeqaıda taza, kórikti ári jaıly qalaǵa aınalady. Naǵyz azamattyq jaýapkershilik osyndaı qarapaıym qadamdardan bastalady», – dedi ekobelsendi, bloger Dýlat Nábıev.
EcoDay aıasyndaǵy ekologıalyq is-sharalarǵa jalpy sany 600-den astam adam qatysty. Bul aksıa 12 tamyzǵa deıin qala boıynsha ótetin ondaǵan bilim berý, mádenı, sporttyq, shyǵarmashylyq jáne qoǵamdyq is-sharalardy biriktiretin ALMA LOVE 2026 jastar festıvaliniń alǵashqy kezeńi boldy.
Aıta keteıik, festıvál Almaty qalasy Jastar saıasaty basqarmasynyń qoldaýymen uıymdastyrylýda.
