Almaty kúnine oraı «Alataý» dástúrli óner teatry XI teatr maýsymnyń shymyldyǵyn túrdi, - dep habarlaıdy alnews.
Jańa maýsym aıasynda kórermen nazaryna «Mamluk. Sultan Beıbarys» spektakli usynyldy.
Sultan Beıbarys óz zamanynyń Uly basqarýshysy, Mámlúk elin biriktirýshisi tulǵa retinde el esinde. Bilikti kóshbasshy Mysyr elin nyǵaıtyp, turaqty elge aınaldyra aldy. Saýndrama janryndaǵy qoıylymda Sultan Beıbarystyń ómir joly, jaýyngerlik erligi men el basqarýdaǵy parasat-paıymy baıandalady.
Qoıylymda dybystyq jáne horeografıalyq sheshimder, etno-folklorlyq áýender men jaýyngerlik rýhty jetkizetin sahnalyq elementter ózara úılesim tapqan. Rejıserlik sheshim arqyly tarıhı tulǵanyń jaýyngerlik bolmysymen birge adamı qyry da ashylady. Ótken men búgindi sabaqtastyra otyryp, spektákl kórermendi ulttyq muraǵa jańasha kózqaraspen qaraýǵa jeteleıdi.
XI maýsymnyń basty jańalyqtarynyń biri – 26 jáne 27 qyrkúıekte kórermenge alǵash usynylǵan «Qorlan» spektakliniń premerasy.
«Qorlan» – belgili ánshi ári aqyn Estaı men ańyzǵa aınalǵan Qorlannyń móldir mahabbatyn arqaý etken jańa sahnalyq týyndy. Alaıda spektákl bir ǵana mahabbat hıkaıasymen shektelmeı, ult taǵdyry, tarıhı jady, áıel taǵdyry, náziktik pen qaısarlyqtyń úılesimi sekildi taqyryptardy keńinen qozǵaıdy.
Qoıylymdaǵy Qorlan beınesi bir adamnyń taǵdyrynan áldeqaıda aýqymdy. Ol myńdaǵan qazaq áıeliniń, ananyń, jar men qyzdyń taǵdyryn boıyna jınaqtaǵan obraz retinde kórinedi. Onyń taǵdyrynan asharshylyq qasireti, qýǵyn-súrgin zary men soǵystyń qaraly izi ańǵarylady. Soǵan qaramastan Qorlan – taǵdyr taýqymetine moıymaǵan, jany jaralansa da rýhy synbaǵan qazaq áıeliniń beınesi.
Osylaısha, «Alataý» dástúrli óner teatry XI teatr maýsymyn jańa qoıylymdarmen bastap, ulttyq ónerdi zamanaýı sahnalyq sheshimder arqyly kórermenge usyndy. Aldaǵy ýaqytta teatr repertýaryndaǵy kórermen yqylasyna bólengen basqa da spektáklder kórsetilip, jańa maýsym aıasynda kórermen nazaryna usynyla beredi.
