Almatyda alǵash ret uıymdastyrylǵan kásibı sýretshiler arasyndaǵy «Ajarly Almaty» respýblıkalyq baıqaýy qorytyndylandy, - dep habarlaıdy alnews.
Baıqaý qala ákimdiginiń qoldaýymen ótti.
Ótinim 7 tamyz ben 7 qyrkúıek aralyǵynda qabyldanyp, osy kezeńde elimizdiń ár óńirinen 168 jumys kelip tústi. Birinshi irikteý nátıjesinde 109 jumys ekinshi kezeńge ótti. Baıqaýdyń jalpy júlde qory 10,5 mln teńge boldy.
16 qyrkúıekte Almaty qalasy mýzeıler birlestigine qarasty Almaty Galereıasynda jeńimpazdardy marapattaý rásimi ótip, baıqaýdyń qorytyndy kórmesi ashyldy.
«Bul baıqaý Almaty qalasynyń ákimi Darhan Amangeldiuly Satybaldynyń bastamasy jáne tapsyrmasy boıynsha uıymdastyryldy. Almaty árdaıym mádenıet pen ónerdiń ortalyǵy bolyp keldi. Qalamyzdyń sulýlyǵyn, ózindik kelbeti men tynys-tirshiligin shyǵarmalaryna arqaý etip, bar sheberligin kórsetken sýretshilerge alǵys aıtamyn. Barshańyzdy Qala kúnimen quttyqtaımyn!» – dedi Almaty qalasy ákiminiń orynbasary Abzal Núkenov.
Baıqaýǵa Qazaqstannyń ár óńirinen kásibı sýretshiler qatysty. Jumystardy sýretshiler, ónertanýshylar, mádenıet salasynyń mamandary, mýzeıler men galereıa ókilderinen quralǵan qazylar alqasy baǵalady. Baǵalaý kezinde oryndaý tehnıkasy, týyndynyń kórkemdik qundylyǵy, ıdeıanyń biregeıligi, mazmuny men kompozısıasy eskerildi.
Birinshi oryn men bas júlde «Almaty – qıal álemi» jumysynyń avtory Nurbolat Asqarǵa berildi.
Ekinshi oryndy «Arý qala» jumysyn usynǵan Nurlan Qılybaev pen «Babe leto» týyndysynyń avtory Maksım Vedernıkov bólisti.
Úshinshi oryn «Posle dojdá, vechernıı gorod» jumysymen Jalǵas Tileýqabylǵa jáne «Almatynyń aq tańy» týyndysymen Qumar Omarhanǵa buıyrdy.
Taǵy bes sýretshi alǵys hattarmen jáne yntalandyrý syılyqtarymen marapattaldy. Olar: Qanat Shúkirbekov, Dáýrenbek Beknazarov, Svetlana Soı, Aqbota Ámirova jáne Muhtar Begenov.
Qorytyndy kórmeni Almaty Galereıasynan 23 qyrkúıekke deıin kórýge bolady. Mekenjaıy: Dostyq dańǵyly, 44.
Sonymen qatar 19-20 qyrkúıekte baıqaýdyń úzdik jumystary Qala kúnine arnalǵan merekelik baǵdarlama aıasynda Abaı alańynda kópshilik nazaryna usynylady.
