2026 jyldyń birinshi jartyjyldyǵynda Almatydaǵy ornalastyrý oryndary kórsetken qyzmet kólemi 53,1 mlrd teńgege jetip, ótken jyldyń osy kezeńimen salystyrǵanda 6%-ǵa artty. Bul týraly qalalyq Týrızm basqarmasynyń ókilderi aıtty.
Qańtar-maýsym aılary aralyǵynda qaladaǵy qonaq úıler men ózge de ornalastyrý oryndary 1,1 mln-nan astam qonaqty qabyldady. Qazirgi tańda qalada týrıser men iskerlik saparmen kelýshilerge qyzmet kórsetetin 448 ornalastyrý nysany jumys isteıdi.
Sonymen qatar, qalanyń qonaq úı naryǵy jańa nysandarmen belsendi túrde tolyǵyp keledi. Jyl basynan beri jeke ınvestısıa esebinen jalpy sany 1 103 nómirge arnalǵan 26 qonaq úı ashyldy.
Budan bólek, aýqymdy jobalar iske asyrylý jáne pysyqtalý satysynda tur. Jalpy quny shamamen 900 mlrd teńge bolatyn 87 qonaq úı jobasy aıasynda 9 590 jańa nómir ashý josparlanǵan.
Almatyda jańadan ashylatyn jáne josparlanyp otyrǵan qonaq úı jobalarynyń qatarynda Radisson Blu Hotel Almaty Airport, Hilton Park Almaty, Marriott, Heritage, Hyatt Regency, Wyndham, JW Marriott Hotels, Radisson Hotel & Residences Almaty jáne The Veil sıaqty halyqaralyq brendter bar.
Osylaısha, Almatynyń qonaq úı sektory qazirgi kórsetkishterdiń turaqty ósimin jáne aldaǵy kezeńge josparlanǵan ınvestısıalardyń aýqymdylyǵyn kórsetip otyr. Jańa jobalar qonaq úı nómirleriniń sanyn arttyrýǵa, saıahatshylardyń ártúrli sanattaryna arnalǵan ornalastyrý múmkindikterin keńeıtýge, sondaı-aq qalanyń iri halyqaralyq, iskerlik jáne týrısik is-sharalardy ótkizý áleýetin nyǵaıtýǵa múmkindik beredi.
Kórsetiletin qyzmet kóleminiń ulǵaıýy, jańa qonaq úılerdiń ashylýy jáne shamamen 900 mlrd teńge bolatyn ınvestısıalyq jobalar portfeli Almatynyń Ortalyq Azıadaǵy jetekshi týrısik jáne iskerlik ortalyqtardyń biri retindegi joǵary áleýetin aıqyndaıdy.
