Almatyda sándik gúldermen bezendirilgen aýmaqtardyń jalpy kólemi 410 myń sharshy metrden asty. Bul ótken jylmen salystyrǵanda 77%-ǵa kóp. Birjyldyq gúlderdiń sany 2,7 mıllıonnan 4,3 mıllıonǵa deıin, al raýshan gúlderi 125 myńnan 580 myńǵa deıin artty. Bul týraly Eco Almaty mamandary aıtty.
Eń iri gúl alqaptary Esentaı ózeniniń jaǵalaýynda – 20 myń sharshy metr, Saıran sý qoımasy boıynda – 15 myń sharshy metr jáne Halyk Arena mańynda 7 myń sharshy metrden astam aýmaqta jasaldy.
Qalalyq aýmaqtardy bezendirý kezinde mamandar Almatynyń klımattyq ereksheligin, ósimdikterdiń gúldeý merzimin, aptap ystyqqa tózimdiligin, kútim jasaý talaptaryn jáne ózara úılesimin eskerdi. Kóshelerge, saıabaqtarǵa, skverlerge, jolaıryqtarǵa jáne sýburqaqtar mańyna shyraıgúl, barqytgúl, begonıa, salvıa, sınerarıa, aqsáýle, gazanıa, kanna, katarantýs jáne basqa da sándik ósimdikter egildi.
Jumystyń erekshe baǵyttarynyń biri – kólemdi gúl kompozısıalaryn jasaý boldy. «Taýly Qyrat» shaǵynaýdanyndaǵy Esentaı ózeniniń jaǵalaýynda bıiktigi 2,5 metr bolatyn taýys beınesindegi topıarıı ornatyldy. Kompozısıa serýen aımaǵy boıymen 30 metrge sozylyp jatyr. Onyń gúlden jasalǵan «qaýyrsyndary» selozıa, shyraıgúl, sınerarıa jáne álternantera ósimdikterinen quralǵan.
Sondaı-aq munda taǵy eki kólemdi kompozısıa – «Qar barysy» men «Alma» ornalastyrylady. Bıiktigi 1,8 metr, uzyndyǵy 4,3 metr bolatyn qar barysynyń músinin bezendirýge 3,5 myń sınerarıa men álternantera ósimdigi paıdalanyldy. Al bıiktigi 2,4 metr, eni 2,5 metr bolatyn gúlden jasalǵan «Alma» kompozısıasy 1,5 myń shyraıgúlden qurastyryldy.
Esentaı ózeniniń jaǵalaýynda jalpy aýmaǵy 20 myń sharshy metrdi qamtıtyn keshendi kógaldandyrý jumystary júrgizildi. Munda japongúl, qyzylkúreń, sarana, floks, kókjalbyz, veıgela, altynshar, lavanda, qoıantamaq, talqýraı, raýshan, kópirshikti buta, sondaı-aq qyzǵaldaq, súmbil jáne lalagúl egildi.
Sonymen qatar jaǵalaýǵa 241 usaq japyraqty jóke, 198 Frıman úıeńkisi, 50 gınkgo bıloba jáne 25 sándik almurt aǵashy egildi. Serýendeýge arnalǵan jalpy aýmaǵy 3 650 sharshy metr ekosoqpaq salyndy.
Gúlden jasalǵan ózge art-kompozısıalar Shuǵyla shaǵynaýdanynda, «Alataý» shıpajaıy mańynda, Sábdenov kóshesinde jáne Abaı dańǵylynda da ornalastyryldy.
Aptap ystyq kúnderi jasyl jelek keshki jáne túngi ýaqytta sýarylady. Qalanyń jasyl aımaqtaryn kútip ustaýǵa kún saıyn 140-tan astam arnaıy tehnıka men 400-den astam qyzmetker jumyldyrylady.
