Almatyda 2026 jyldyń qańtar-qyrkúıek aılarynda 1,97 trln teńgeniń ónerkásip ónimi óndirildi, - dep habarlaıdy alnews.
Bul ótken jyldyń osy kezeńimen salystyrǵanda 22,2%-ǵa artyq. Ósimge negizinen mashına jasaý, tamaq jáne farmasevtıka salalarynyń damýy yqpal etti. Bul týraly qalalyq Kásipkerlik jáne ınvestısıalar basqarmasynyń ókilderi aıtty.
Óńdeý ónerkásibindegi óndiris kólemi 1,67 trln teńgege jetip, jalpy ónerkásip óndirisiniń 84,8% boldy. Osy salanyń ósý qarqyny boıynsha Almaty Qazaqstan óńirleri arasynda kósh bastap tur.
Eń joǵary ósim mashına jasaý salasynda baıqaldy. Munda óndiris kólemi 66,3%-ǵa artty. Óndirilgen ónimniń edáýir bóligin avtokólik ónimderine tıesili.
Tamaq ónerkásibindegi óndiris kólemi 9,4%-ǵa ósip, 261 mlrd teńgege jetti. Farmasevtıka salasynda 20,4% ósim tirkelip, ónim kólemi 21,8 mlrd teńgege jetti.
Ónerkásiptiń damýyna Almatynyń Indýstrıalyq aımaǵynda jańa óndiris oryndarynyń ashylýy da serpin berip otyr. Jyl basynan beri munda jalpy quny 5,8 mlrd teńge bolatyn bes joba iske qosylyp, 345 jańa jumys orny quryldy.
Olardyń qatarynda ALC panelderi men gazobloktar óndiretin zaýyt, Euro Truck Service logıstıkalyq ortalyǵy, jylý jáne sýmen jabdyqtaý jabdyqtaryn shyǵaratyn keńeıtilgen óndiris kesheni, sondaı-aq eki shaǵyn ónerkásiptik park bar.
2026 jyldyń sońyna deıin jalpy quny 6,7 mlrd teńge bolatyn taǵy alty jobany iske qosyp, 346 jumys ornyn ashý josparlanyp otyr.
Qazirgi ýaqytta Indýstrıalyq aımaqta jalpy quny 1 trln teńgeden asatyn jobalardy júzege asyryp jatqan 163 kompanıa jumys isteıdi. Atalǵan jobalar aıasynda 10 myńnan astam jańa jumys ornyn qurý kózdelgen.
