Almatyda Qazaqstan Respýblıkasy jańa Konstıtýsıasynyń kúshine enýine oraı 2 myńnan astam stýdentti, eriktini, belsendi jastar men qala turǵyndaryn biriktirgen jastardyń patrıottyq aksıalary ótti, - dep habarlaıdy alnews.
İs-sharalardy Almaty qalasynyń Jastar saıasaty basqarmasy uıymdastyrdy.
Baǵdarlama «Suńqar» halyqaralyq shańǵy tramplınderi kesheniniń aýmaǵynda Qazaqstan Respýblıkasynyń Memlekettik Týyn saltanatty túrde kóterý rásimimen bastaldy. Saltanatty rásimge 500-den astam almatylyq jas qatysyp, Memlekettik Ánurandy oryndap, memlekettik rámizderge qurmet kórsetti.
Basty oqıǵalardyń biri jańa Konstıtýsıanyń kúshine enýine arnalǵan kórkemdik aksıa boldy. İs-shara aıasynda bıiktigi 4 metr, eni 2,5 metr bolatyn Konstıtýsıa beınesindegi art-nysan tanystyrylyp, Konstıtýsıanyń negizgi qaǵıdattaryn – zań ústemdigin, adam quqyǵyn qorǵaýdy, múmkindikter teńdigin, azamattyq jaýapkershilik pen qoǵamdyq kelisimdi beıneleıtin taqyryptyq kórme uıymdastyryldy. Sonymen qatar qatysýshylar úshin ınteraktıvti alańdar, shyǵarmashylyq qoıylymdar jáne mýzykalyq baǵdarlama usynyldy.
Merekelik is-sharalardyń taǵy bir alańy Qazaqstan-Brıtan tehnıkalyq ýnıversıteti boldy. Munda 700-ge jýyq stýdent, erikti jáne qoǵamdyq belsendi Qazaqstan Respýblıkasynyń Memlekettik Týlarymen patrıottyq fleshmobqa qatysty.
Aksıaǵa qatysqan almatylyq jastar jańa Konstıtýsıanyń kúshine enýi ádilettilik, zań ústemdigi, adam quqyǵyn qurmetteý jáne azamattyq jaýapkershilik qaǵıdattaryna negizdelgen el damýynyń jańa kezeńin bastaıtynyn atap ótti.
Almaty qalasy Jastar saıasaty basqarmasynyń málimetinshe, el úshin mańyzdy bul tarıhı oqıǵaǵa alǵashqylardyń biri bolyp jastar ún qatyp, azamattyq ustanymdaryn zamanaýı qoǵamdyq bastamalar, shyǵarmashylyq jobalar men patrıottyq aksıalar arqyly bildirdi.
«Konstıtýsıa – bul tek quqyqtyq qujat qana emes, memleket pen qoǵam arasyndaǵy senimniń negizi, eldiń odan ári damýynyń basty baǵdary. Búgin Almaty jastary ózderiniń belsendi qatysýy arqyly Qazaqstannyń bolashaǵyna jaýapkershilikpen qaraıtynyn, memlekettik qundylyqtardy qurmetteıtinin jáne ádiletti, qýatty ári órkendegen memleket qurý isine belsendi atsalysýǵa daıyn ekenin kórsetti», – dep atap ótti basqarma ókilderi.
